大摩隻「勝利歡星」來頭甚勁，同父馬有「澳斯卡」同埋「南方快車」等，擺明早熟一族，嚟香港前經已露過一手，在馬善拿訓練下一出即勝，贏完後即被「勝利」系馬主睇上。隻馬在港第一仗出戰田草千二米得第五名，輸唔夠兩個馬位俾頭馬「老友威威」，表現雖然唔算突出，但起碼贏咗隻大熱門「嫡愛寶」先，呢次馬房同佢轉戰谷草千二米，顯然打過算盤，有把握先至夠膽出戰窄場。其實以「勝利歡星」上場跑第五名嘅賽績，只要本身續有進步，跑番沙田千二米經已有入圍機會，馬房刻意同佢轉戰谷草千二米並非無原因，事關呢隻馬喺未跑上仗田草千二米前，馬房曾經同佢安排試過一課谷草一千米，由於呢課大閘總共有八隻馬試，「勝利歡星」抽個七檔起步，由祈普敦考驗，起步鞍上人冇替呢隻馬搶放，只順其自然發揮，入到直路，輕鬆爭入第四名，呢課馬匹仲未戴上眼罩，所以起步麻麻，但衝刺不俗。大家再睇吓呢隻馬，上場出賽時係有戴上眼罩跑，結果頭段跟得唔錯，一早守住三三四四位置，只係末段衝力未夠貫注而已，所以僅衝得近而未能入三甲。話俾大家聽，呢隻馬喺澳洲贏馬嗰場，隻馬係有戴眼罩跑，睇谷草呢課試閘，頭段反應唔快，但衝得似模似樣，本身場地性能肯定唔錯，而上場狀態唔弗，加個眼罩跑都可以近，呢次跑谷戰，對手唔強，加上有過一次出賽經驗下，呢隻「勝利歡星」怕且可以喺跑馬地呢條賽道贏馬開齋。