今個禮拜眾人焦點自然落喺四場國際賽，呢次日本隊派出十三駒龐大陣容，希望繼○一年後再創佳績，該屆日本隊喺四項錦標中囊括三項，「黃金旅程」贏瓶，「榮進寶蹄」捧盃，「愛麗數碼」奪一哩，只失落短途錦標。呢一屆日本隊派十一駒分駐四個大賽，全部都有實力，有機會四個錦標都擸晒。據聞日本方面拉大隊來港捧場，連同馬主及傳媒，起碼有二、三百人。呢個國際盛事，由於一口氣跑四個唔同路程，吸引世界各地名駒參與，另一方面，亦吸引到唔少馬販來港兜客，好似剛跑完呢次國際騎師賽咁，凱旋門上有唔少馬販出現，佢哋獲馬主之邀出席拉頭馬儀式，威威之餘當然會曬下所賣嘅馬有幾咁犀利，順便搭路促銷。而呢晚「嫡愛寶」贏馬，凱旋門上拉頭馬者，除馬主團體成員外，仲有派斯代表馬販出席，非常熱鬧，呢隻「嫡愛寶」大家都睇到，實力有幾犀利，呢次首戰谷草短途，因為排咗十二檔，雷神藝高人膽大，決定唔搶放，留守馬群尾，結果俾佢衝贏眾對手取勝，由呢場所見，「嫡愛寶」仲有上升空間，日後往窄場發展，一定有排贏。呢隻派斯招牌馬一定吸引到唔少人注意，其實，同場跑第二嗰隻「一馬當先」亦都係派斯馬，除此之外，第五班仲未出頭嗰隻「樂家將」，呢次跑第二名，又係派斯所買，呢個馬販旗下馬匹多數都有唔錯嘅戰鬥能力，難怪趁國際盛事舉行，派出代表嚟香港走轉，希望兜多啲生意。
呢個禮拜日，出自派斯手上馬亦唔少，其中一隻就係告東尼馬房嘅「勝得威」（圖前駒），目前跑兩次得一冠一亞，兩次所跑路程都係千四米，第一次一出即勝；第二次再出，輸俾「翔惑」得亞軍，後者今季經已贏過兩次千四米，實力絕對唔簡單。屆時呢隻「勝得威」只要跑番水準，又有機會替派斯省招牌。