呢次國際賽最強陣容都係日本隊，基本上每項錦標都有惡馬在陣，其中最強當然係香港盃，「滿樂時」及「榮進之光」都屬爭盃主角，呢兩隻馬更視呢場為退役前最後一戰。「滿樂時」上屆一哩錦標盟主，呢屆向香港盃出發，跑二千米有兩戰一冠一亞成績，再配合莫雅呢位高手，梗係唔能夠睇少。不過同係日本隊廄侶「榮進之光」，夥拍日本元老級好手武豊，再睇佢五月份贏法國一級賽，在千八米上狂勝對手十個馬位，足見隻馬的確唔簡單，呢匹上屆香港盃盟主，今屆操足再臨，兩匹日本兵各自為戰，應該會鬥得好激烈，由於「榮進之光」有「滿樂時」同場，估計分頭都唔會太差，當然數來數去，唯一有機會贏「滿樂時」，都係呢隻自己友。「榮進之光」跑過六次二千米，三贏三輸，一係贏晒，一係輸晒，假如佢係香港馬，好多馬迷仲以為幕後係無寶不落，其實非也，呢隻馬原來有個習慣，就係行圈好緊張，日本跑本土國際一級賽，參戰馬規定要喺沙圈行足一粒鐘，大家都知道，日本馬迷幾咁熱情，尤其跑大賽，啲馬迷一早排隊爭崩頭咁衝入馬場霸靚位，「榮進之光」喺咁多馬迷情況下，行一個鐘頭沙圈，隻馬作戰情緒想好都幾難，所以隻馬跑本土賽成績麻麻，反而出到外面就係威係勢，好似五月份法國贏一級賽咁，立刻表現出真正實力出嚟。所以隻馬今次絕對有本錢再衛冕香港盃，而「滿樂時」只係以挑戰者身份向「榮進之光」討教。