說好的「勇武」呢？「熱狗」（「熱血公民」）參選立法會時口口聲聲主張「勇武」、要走新路線云云，但當「熱狗」主席蟲泰（鄭松泰）坐暖議員個位之後，就改口宣稱「將全面撤出社會運動」，因為「現今街頭行動的風險比以前大」，所以改做「社區服務」喎。咁都講得出，當然畀人鬧爆之前用「勇武」嚟呃票。向來同「熱狗」有仇嘅網媒《輔仁媒體》總編「容癌」（容樂其）隨即喺自己facebook出文，用歌詞「什麼都不算什麼」去揶揄「熱狗」講過唔算數。 ■記者 甘瑜
蟲泰日前接受《立場新聞》訪問，宣佈「熱狗」短期將「全面撤出社會運動」，改做社區服務，自己喺立法會就會專注教育及文化議題。點解突然無法「勇武」呢？蟲泰解釋，因為「現今街頭行動的風險比以前大」，並進一步演繹話因為有「無間道」，驚自己會畀人「篤灰」，而且「熱普城」喺體制度得佢一個，所以要「按兵不動，養精蓄銳」。
「容癌」譏「熱狗」走數駁篤灰論
蟲泰一坐暖張櫈就變臉，說好的「勇武抗爭」路線就此消失，畀佢哋呃票嘅心理唔平衡之餘，畀佢哋𠝹票嘅更係怒火中燒。立法會選戰間已經一再幫「青症」（「青年新政」）去打「熱狗」嘅「容癌」，就喺自己fb出文，用歌詞「什麼都不算什麼」去揶揄「熱狗」講過唔算數，更轉載其網媒底下一篇文章去數臭「熱狗」。
該篇文章一開始仲好似係幫緊「熱狗」，話「退出社運圈又好，撤出重力圈也好，有時是基於現實所限」，但轉頭就反駁蟲泰嘅「反骨仔篤灰論」唔合理，「篤灰告密從來不缺，有建制派來，也有圈內仇家，甚至單純是審問房壓力下屈服亦大有人在。為何今日才有此結論？」網民「Jason Cheung」就喺下低留言話︰「立法會仲多內鬼呀，唔退出？」