■展鵬稱不單沒有加價，而且還減價接工作。香港文匯報訊（記者 梁靜儀）陳展鵬昨日以火車車長造型到坑口出席商場開幕活動。展鵬成為出爐視帝後是非陸續來，除當年未紅時的歷史被重提外，更被指他要求拍劇酬勞由三千元加至三萬元一集，對此，展鵬否認，並指自己仍未買到樓。
剛榮升視帝的展鵬表示，不單沒有加價，而且還減價接工作，他說：「今日個活動係得獎前接落，（冇得加價好唔抵？）唔係喎，最近聽經理人講，最近有個job減咗少少價，因為個客戶一向都搵開我，大家有來有往。」
近日有傳他去年續約無綫，要求拍劇酬勞由三千元加至三萬元一集？展鵬否認說：「計落條數我一年拍兩套好易上車（買樓），但我仲未上車，證明我仲要努力，公司各位阿哥阿姐都揸靚車住豪宅，酬勞都唔止呢個價，（有意買磚頭？）今年內都應該未上到車，要努力儲吓錢先，想買間夠全家人住的屋。」問到工作上可有加價？他重申說：「梗係冇啦，邊有咁容易，酬勞資料TVB高層至有，除非高層放料啦！」
當年拒穿緊身衫有因
提到前亞視金牌監製楊紹鴻早前出書爆料，指展鵬當年因為發少爺脾氣，拒絕着黃色緊身衫拍李小龍特輯而遭雪藏。展鵬承認真有其事：「件事只係一個爆發點，之前累積好多嘢，話雪我嗰半年，我係冇簽約，因為公司高層調動，我冇約喺身，都唔知點計騷錢。當時公司突然叫我着咩黃色貼身衫，我諗可唔可以畀啲時間我操練少少，嗰時廿幾歲又瘦，雖然收視唔理想，但都想用心做好件事。」他又多謝亞視當年給他很多學習機會，楊紹鴻是他的伯樂。
另外，有指他當年出席首映，因沒有傳媒影他相而走入洗手間喊，展鵬就否認有喊：「冇匿廁所喊，當時好多公關好好，邀請我去睇首映，有次去到首映冇人影，覺得唔好意思，下次再去就梗係搵位避，開場至出嚟，唔通一個人戇居居咩？」說到他現在出席首映禮不用再匿埋廁所？他笑說：「急都要去洗手間嘅。」
問到他現時成為視帝，會否覺得爭氣？展鵬說：「唔覺咩爭唔爭氣，嗰個階段似係做呢行又唔似係呢行，比較失落。現在都唔係咩咁威水，喺TVB多咗人認識，多咗朋友，我年資算有返咁上下，入行21年，係老屎忽。」