■鄭中基被太太余思敏的一番感言搞喊。少聯絡阿Sa 找千嬅踩場須問妻
香港文匯報訊（記者 李思穎）一連四場鄭中基（Ronald）「PLAY IT AGAIN世界巡迴演唱會」前晚在紅館圓滿結束。自爆在開騷前患上人群恐懼症的Ronald，獲爸爸鄭東漢、老婆和一對仔女上台支持，其太太余思敏的一番感言更搞喊老公Ronald，場面溫馨。除了之前邀得舊愛楊千嬅做嘉賓，其前妻蔡卓妍（Sa）則未見露面，Ronald大方表示找千嬅出現要問准老婆，至於跟阿Sa便甚少聯絡了。
鄭中基的太太和子女連續三晚都有來捧場，其他到來睇騷圈中人有譚詠麟、胡楓和孫仔、陳浩民和太太、李燦森等。阿倫好有心從觀眾席行到台前派利是給Ronald，Ronald瞓身接上。當Ronald和父親鄭東漢合作唱完《人若然忘記了愛》後，Ronald的一對子女出現台上，囡囡Emma淡定獻唱賀年歌，其後Ronald慈父上身向子女送吻，由爺爺帶返落台，隨後Ronald唱完《三生有幸》，太太突然現身舞台，並講了一番「愛的感言」：「大家好，多謝大家支持佢，作為佢另一半當然知道唱歌係佢最叻、最鍾意，正正係咁，佢面對自己壓力和要求更高，需要更大勇氣面對這個舞台，我可以做到的是好少，只可以在後面做佢強大後盾，等佢無後顧之休，可以做鍾意的事。佢每晚都多謝我，我都多謝佢，睇到呢段日子面對壓力、犧牲同付出，我成日同佢講唔好介意結果，要享受過程，就算無觀眾，我都會坐在下面聽你唱每一句，永遠支持你，多謝你老公！」Ronald即感動得眼濕濕，兩人擁抱親嘴。
子華寸中基唱情歌缺形象
尾場首位出場表演的嘉賓是陳慧琳（Kelly），Kelly穿上紅色半截裙和絲襪坐在行李箱上「型爆」現身，她捨棄新春外遊專誠留港支持Ronald是為「報恩」，她說：「當年我是新人在台灣出碟，我同Ronald有首合唱歌，全靠Ronald帶起我，令我有非常好開始，今日邊度都唔去，要來支持你。」Kelly獨唱時更走近觀眾席狂逗利是，氣氛甚佳。
自爆患上「人群恐懼症」
另一位嘉賓是「男神」黃子華，子華在台上大放笑彈掀起全晚高潮，他謂：「鄭中基是奇人，一個唱情歌歌手都可以亂放嘢落口，唱情歌有一定形象！你有無見過張學友食住臘腸當波板糖唱《每天愛你多一些》？有無見過張國榮食牛雜唱《風繼續吹》？但鄭中基就食過『牛歡喜』，一個食過牛歡喜嘅人點可以唱情歌？只有鄭中基得，他一開騷便爆滿，嘉賓都無飛，原本我都好嬲，但見到佢老豆上來伴奏，全家仔女來了表演，因為係無飛。」全場大笑，子華連台上的譚詠麟都不放過：「有個人有鄭中基八成道行，就係倫哥，倫哥又係狂食。」Ronald笑言：「佢係素（掃）食者。」子華：「素來無嘢唔食，結果咩都掃晒。」台下觀眾起哄狂笑。最後兩人合唱《風的季節》，子華全程唱到五音不全，相當好笑。
Ronald又透露原本前輩劉德華來捧場，但因在泰國拍廣告受傷來不到，但相當有心，送來利是和柑給他吃，並祝他演出成功，在此希望現場所有人把電話的燈亮起，大家祝願華仔早日康復，全場即呈現出一片燈海。近尾聲時，Ronald自爆決定開演唱會時因太緊張，又太耐無唱歌，結果患上「人群恐懼症」，見到人會頭耷耷心跳加快，想起已經驚，之後家人給予他很大鼓勵，有些事要去做要去面對，病情維持了數個月，經醫生診治後已告痊癒。
慶功宴上，Ronald和女兒Emma和太太合照，Emma又再唱賀年歌，又跟爸爸錫錫，冧爆爹哋，Ronald對自己演出不是太滿意，因頭兩場過分緊張用力，以致打後兩晚要看醫生服消炎藥。Ronald在台上講到以前的女朋友都無票，免得來摑自己兩巴，但就指千嬅好善良，問到Ronald會被誰人摑？他笑說：「稿來啫，（何以只找千嬅，不找阿Sa做嘉賓？）千嬅翻唱過我首《閉目入神》，（跟阿Sa好少聯絡？）好少，反而Sa爸見得多，之前在電影公司春茗先見過。（請舊愛要問准老婆？）OK，都有問『好唔好呀』，大家都咁大個，無所謂啦。」