■鄉議局在沙田馬場搞午宴，葉太都有出席。朱朗文 攝噚日沙田日馬第五場係一年一度嘅鄉議局盃，一眾鄉紳當然要隆重其事，包咗廂房搞午宴。身為愛馬之人嘅鄉議局主席劉業強致辭時，講講吓講咗去另一場跑馬仔--特首選舉，佢形容戰況激烈，要睇啲「馬」嘅往績、場地同跑法，最重要係識跑沙田，「因為我哋係新界人，佢唔識跑沙田，我哋唔會支持。」
佢又話「馬匹」父系、母系、背景唔緊要，最重要夠全面，沙地、泥地、草地、長途、短途乜都識跑，估計最後有3隻入到閘，佢自己會聽取鄉民意見，希望未來特首都要聆聽各界意見。
唔講咁遠，講返噚日場跑馬仔，劉業強畀咗第四場2號同鄉議局盃第五場7號做貼士，前者叫「平天下」，唔知係咪佢對新特首嘅期釧O？最後隻馬都跑到第一。後者「魅力知友」就只係跑到第七，13號「鎏金驃 」就贏到鄉議局盃。
特首參選人、新民黨主席葉劉淑儀亦都賞面出席，仲帶埋囡囡榮欣嚟，留到睇埋鄉議局盃先走，認真唔話得。 ■記者 朱朗文