■陳敏之初為人母，很多事都不假手於家傭。陳敏之主演的《親親我好媽》成為黃金時段三線劇最高收視劇集，認真可喜可賀。新手媽媽陳敏之表示拍此劇感觸甚大，明白現今在香港，不論是學生還是家長都有很大壓力。這一刻囝囝雷子樂才兩個多月大，自己只望囝囝健健康康。至於是否會做「怪獸家長」，敏之笑言少少怪獸自己也可接受，但不會太誇張!■採訪、攝影：植毅儀、髮型：Eve、化妝：Jessica Chan、服裝：ST.STUDIO
新手媽媽陳敏之在去年冬至開刀誕下兒子雷子樂（乳名冬至），才剛坐完月，敏之已經出關頻頻為劇集做專訪宣傳。說到此劇拍攝後期，敏之知道自己有了BB，所以很感恩上天對她的愛錫。
「劇中我演單親媽咪兼訓導主任文嘉熙，經常面對一班『怪獸家長』，拍到後期知道自己懷孕，有時都會諗將來自己係咪都係會咁怪獸呢？上天對我好好，大家都知道拍劇係好辛苦，當初都沒想過拍劇期間會有BB，但既來之則安之。也因為已是差不多拍到尾段，好多嘢都拍晒，自己也有很多時間休息。我啱啱升級做媽媽，自然會緊張一些，不過我絕對唔會迫個仔做任何嘢。」
做適可而止的「怪獸」
愛兒子樂於冬至出世，所以其乳名就叫雷冬至。剛坐完月，敏之已經出關為劇集宣傳及投入《溏心風暴3》拍攝。始終是初為父母，敏之又餵母乳，所以很多時很多事都很着緊，絕不假手於家傭及陪月姐姐。
「我已經佗到成7個月先至去買BB嘢，等自己可以放輕鬆心情，事前也和老公上了多次的育嬰班，但原來當BB真係出世，一樣係會手忙腳亂。特別是出街特別心掛掛，想即刻返去睇佢，電話裡面全部都係他的相。自己都唔想變『怪獸家長』，所以都選擇邊工作邊湊仔，唔會做全職媽咪，唔想成日將個焦點去晒囝囝度。但將來佢讀書，應該會好緊張，但應該唔會報好多興趣班，做適可而止的『怪獸』吧！」