上周禮拜六澳洲嗰邊跑藍鑽石錦標，莫雷拉有份出席，雖然贏唔到呢項一級賽，但憑「愛凡納」贏場顏士高錦標二級賽，再憑「聳動」贏渥利盾一級賽，你都咪話莫雷拉唔犀利，香港宜家冇騎師能夠威脅到佢，佢惟有揀啲有難度嘅馬挑戰自己。好似呢次夜賽第八場咁，莫雷拉可揀蔡廄新勝呢個路程嘅「活力寶」，仲有隻演出準繩嘅「嫡愛寶」，甚至乎大摩隻「飛龍駒」佢都可以揀，事關呢一系馬，近期多數由佢掌帥權，所以雷神出到聲，冇理由唔俾佢優先。最尾佢應承替容天鵬馬房隻「盈利駿馬」（圖前駒）披甲，莫雷拉呢個選擇，明顯係選難不選易嘅挑戰，「盈利駿馬」季初曾由莫雷拉贏過場泥地千二米，莫雷拉僅僅騎贏蘇兆輝隻「華美之友」，但贏完後「盈利駿馬」就成隻散晒，相隔兩個幾月最近一月底先至再由巫顯東跑入第三名，頭二馬屬「幸運年年」及「翩翩」，呢場係田草千二米，「盈利駿馬」呢席位置屬九十九倍大冷門。
由於高班泥地賽程唔多，「盈利駿馬」喺田草跑入冷位後，苦無泥地賽程揀，馬房又想保持隻馬有一定運動量，所以急急再同隻馬出戰田草千二米，但由於已失去新鮮感，加上途中受碰，所以呢仗大敗十多個身位而回。呢一場「盈利駿馬」冇表現，絕對係場地性能未合，講本身馬匹狀態，一路復甦緊，上個禮拜，馬房安排呢隻馬跳快工夫，全程由副練一手一腳進行，當然，莫雷拉接得呢隻馬嚟騎，亦早對呢隻馬性能有所認識，畢竟佢第一次騎呢隻馬就能勝出，大概佢亦知道呢隻馬泥地性能威力達到乜嘢級數。今次莫雷拉在眾多實力馬之中揀呢隻「盈利駿馬」上陣，雖然實力並非超級，但從動態顯示，雷神有心挑戰難度，估計到時會跑得好。