二月廿六日至三月一日呢段時間澳洲都有拍賣會進行，唔少練馬師上個禮拜經已走咗過去入貨，當中有文家良、呂健威、姚本輝及徐雨石，雖然呢批練馬師身在外地，但對倉務一樣緊張，每日除有電話跟副練聯絡外，短片傳送更唔使講，由於呢批練馬師上個禮拜經已喺澳洲，正常情理重點都會喺周日出賽戰馬，不過，呂健威問完周日戰馬，就緊張埋明晚一批參賽戰駒，其中一隻就係「公証揚鳴」，新勝泥地千二米，上場贏馬姿態大把喺手。上場「公証揚鳴」贏泥地千二米後，馬房安排佢抖咗兩日，之後再同隻馬安排踱步及游水等較悠閒活動，不過，練馬師向副練打聽田泰安幾時再同隻馬打磨，結果上個禮拜五及禮拜六經已重新安排由田泰安替呢隻馬內圈踱步，大家可以翻查一下晨操表，周五及周六呢兩朝「公証揚鳴」大圈踱步，呢類鎖碎工夫都係由田泰安一手包辦，重視程度可想而知。呢隻馬幕後自視都幾高，雖然宜家贏泥地千二米，算交出一啲成績，但本身呢隻必定係中距離馬，因為喺澳洲呢隻馬係贏一三五○米，睇上季尾，馬房曾經部署跑田草千四米，但效果一般，所以嘗試進軍泥地，估唔到就此一擊得手，呢次再跑場泥地千二米，幕後一樣有信心贏，不過，佢哋都會作出兩手準備，萬一呢次短途有閃失，下次就會部署向一哩進發，通常適合跑泥地千二米嘅馬，唔少是有一哩韌力，目前田泰安好似當隻馬係仔咁扮，擺明是有連勝嘅機會。