賀賢馬房的六歲馬「獨具慧眼」，來港經已三個馬季但仍未出頭，只錄得兩亞一季上名成績，主要原因是關乎足部健康影響，故此上季僅能在泥地出爭兩場短途。此馬踏入今季後健康情況已趨穩定，今次出戰泥地一哩，賽前有兩個月時間回氣，埋門再試好泥地大閘慢火煎魚，目前評五十六分比來港時已少十四分，最重要係賠率方面必定有分頭，今次養精蓄銳而來估計可見真章。
每年打吡冠軍一匹，然而每季進口想捧走此項夢寐大賽之良駒卻如恆河沙數，今季四歲二線中長途分子的質素，與等閒舊馬相比不落下風，很多已交過亮麗成績單。今次又有匹已報跑打吡的四歲馬上陣，話漏夜趕科場又好，密食當三番又好，總之就擺到明搶錢格，列陣第八場二班千二米的「加州議長」，來港頭兩場千四米跑位置；第三場轉去泥地千二米即贏；之後兩戰草地得一亞一第五；所以今次馬房安排返泥地勝途上陣，總之捨難取易贏多場先再作打算。泥地賽事向來編排較少，列陣的馬匹通常與快活谷的夜賽相似，都是熟口熟面的一小撮。「加州議長」經過汲取陣上經驗後不斷進步，現再戰勝途有力報捷。