■黃任匡及其所屬的「真普選醫生聯盟」被指係內鬼。fb圖片「民主300+」變成「造王300+」都算，而家仲變埋「霸道300+」？向來都係各持己見嘅「民主300+」，近日40幾人開完會後，「專業議政」郭榮鏗就出嚟宣佈，話大家會一致投票畀最高民望者，其實咪即係佢哋之前成日都想支持嘅曾俊華啫。不過，40幾人開完會就代表到300幾個選委？有返少少常識都知冇可能咁易「all in」啦。醫學界選委、「真普選醫生聯盟」黃任匡只係講咗句唔使咁快決定，鄺葆賢亦話唔同意，兩人就即刻俾人圍攻佢哋係內鬼，真係好「民主」同「和諧」囉。
質疑唔開條件自動送票
點解黃任匡等人會俾「同路人」猛烈炮轟呢？原因都係「你知道得太多了」。話說郭榮鏗當日宣佈話「民主300+」跟民意「all in」，黃任匡當晚就喺facebook出文，質疑有關做法。佢在文中反問道︰「我哋咁快衝出嚟，仲有成個三月流流長喎。無理由乜都唔洗（使）再爭取，『民主派』齊齊番（返）屋企瞓覺等投票日，咁加（㗎）嘛係咪？我地（哋）想再努力多一陣幫香港爭取多少少民主啫。唔係冇用㗎喎，薯片（曾俊華）過去幾個禮拜個政綱真係有微調㗎喎，係咪？不如忍多兩個星期先啦。」
佢又同時正中紅心咁質疑︰「如果係跟民意，之前攪（搞）咁多嘢做咩呢又？Day one（第一日）出嚟話跟民意投票同提名咪得囉。講咩民主呢？嗌乜嘢『換人換制度』、『撤回8．31』呢？」
咁都唔止，佢仲回帶整個當年「民意走勢圖」，顯示「民主300+」最唔鍾意嘅現任特首梁振英，當年民望都係贏人幾條街，但反對派現在就猛批對方，故選委應自己做決定，「唔好賴落民意度」，仲反問如果有人動員支持林鄭月娥，「到時『奶媽（林鄭）』民意第一，你『D300+』吊頸都唔掂。」
被批借民意過橋搬龍門
其實，「民主300+」入面都仲有唔少人都認同黃任匡講法，例如同樣係醫學界選委嘅鄺葆賢就畀like支持，IT界選委陳澤滔都喺fb出文話︰「問心......去返上年十二月嘅時候，大家真心覺得『跟民意投票』係一個好好嘅政綱？唔好因為民意喺你果（嗰）邊就搬龍門。......投曾俊華，其實真係唔洗（使）用民意過橋。我入得嚟選，我就會為我投果（嗰）票負責。」
黃任匡被指係鬼狂批鬥
咁唔跟「隊形」，當然就會俾人批鬥啦。有網民就喺黃任匡個fb，同埋佢所屬嘅「真普選醫生聯盟」嘅fb專頁留言，仲整埋圖話佢哋係內鬼。「Hang Jai」話︰「一早知你呢班醫生係鬼啦！」佢仲鬧︰「呢個『真普選醫生聯盟』就永遠都要同其他『300+』選委唱反調，唔睇民望，咁仲要睇咩？」有人立即將佢哋打成林鄭陣營。「WG Fdam」話︰「『真普選醫生聯盟』既（嘅）同志真是做得非常好，林鄭當選後必定對你們論功行賞！」 ■記者 甘瑜
