■「香港眾志」的帖子。網絡發達、資訊氾濫，想斷章取義屈人有時好易，但有時都相當困難。「香港眾志」副秘書長周庭，前晚在選舉論壇後追擊各候選人。她在自己fb發帖，話自己追問候選人林鄭月娥會否承諾當選後不會DQ民選議員喎，對方就「黑面」，只係叫佢唔好咁偏激咁話喎，好似完全冇答過。不過，現場有記者嗰喎周庭小妹妹。報章報道話林太當時一直面帶微笑，仲答咗「特首唔能夠凌駕法律」、「特首要依法辦事」，咁到底係周庭斷章取義來抹黑，定係現場記者講大話先？
周庭前晚在fb以《我問林鄭會唔會承諾唔DQ議員，佢答：小妹妹唔好咁偏激》，文中稱「眾志」一班人當時在「民主思路」選舉論壇場外「追擊林鄭」，「我哋幾經辛苦行到佢面前，我問佢會唔會承諾當選後唔DQ民選議員，佢黑哂（晒）面咁答：小妹妹，唔好咁偏激啦，你媽媽會好擔心你㗎。......林鄭話我偏激，拒絕承諾唔再DQ，證明林鄭淨係識躲喺『中共操控』嘅小圈子選舉入面，連咩係民主唔知。」
不過，講大話係唔啱（㗎）。親反對派報章《蘋果日報》報道此一場面係點寫？雖然該報做咗「標題黨」，標題係「林鄭拒答問題反教訓周庭」，但內文就寫「林太在周庭提問時一直微笑，......周庭問她，如她當選會否承諾不作司法覆核取消民選議員的資格，林太稱，『唔好咁偏激，小妹妹，你媽媽好擔心你呀』......」
斷章取義 林太多句話「被消失」
周庭話黑面，記者話微笑喎。睇到呢度，林太個回應好似真係周庭篇帖文咁講，淨係講咗「唔好咁偏激喎」，但報道仲有下文，就係林太當時講咗，「香港是法治社會，現時事件由法庭處理中，」並強調「『特首唔會凌駕法律，特首都依法辦事架（㗎）妹妹』。」
咦，點解多咗咁多句嘅？周庭小妹妹撞聾？定係《蘋果》記者作故仔？「眾志」fb在發帖中也都只引述了「小妹妹，你媽媽好擔心你啊！」這一句，似乎唔係疏忽而係特登嗰喎。原來，當晚「眾志」一夥人也追問了另一候選人胡國興，但對方只稱「案件進入司法程序不便評論」，講多兩句都係冇答仲掉頭走咗去口添。其實，唔滿意人哋個答案，可以話唔滿意，答得唔具體，但如果成篇帖文都寫到人哋好似完全冇答過咁，就似乎係存心誤導囉。 ■記者 羅旦