先講一講蘇偉賢今季同莫雷拉合作成績，暫時嚟講，合作過二十四次，得八冠三亞三季，上名率超過一半，勝出率有三分一，所以呢個馬房用得莫雷拉必有料到。呢次夜賽，賢廄有隻報跑三班千二米嘅「麯院風荷」，上場喺同一路程由蔡明紹披甲，臨場隻馬落到啡燈開跑，果真有料到，蔡紹明雖是第一次騎，但起步經已第一時間彈出，沿途積極搶放，沒料到該晚杜利萊大發神威，頭場先策蔡約翰「飛霞」得亞軍，未幾贏隻「秘密武器」爆出半冷門，跟住尾場好似越騎越有信心，眼見「麯院風荷」帶到終點之際，杜利萊夥拍「勝利名星」終點線力壓「麯院風荷」，「麯院風荷」最終只得亞軍。但大家記唔記得「勝利名星」未有過關飛過落嚟嘅時候係一隻大熱門馬，但當過關飛過咗之後，佢啲獨贏票數變得越來越冷，相反「麯院風荷」就越來越熱，咁即係話，幕後有一批人睇好「麯院風荷」多過「勝利名星」。輸W中Q雖有盈利，但應該冇想像中咁應棍。上次「麯院風荷」突擊失手，亦暴露咗狀態在戰鬥水準，所以今次幕後點計數，呢場都唔會有好分頭，索性卜定雷神騎呢隻馬，雷神睇過片，亦信任蘇偉賢俾佢嘅坐騎多數有一定爭勝水準，所以爽快咁應承咗。隻馬今次強配志在補中，因為馬主個仔亦有愛駒喺呢晚上陣，佢公子隻馬係「霽月高風」，投入容天鵬馬房，兩父子同晚均有馬列陣，呢類咁嘅場合，相信兩父子唔會甘心空手而回。