■郭家麒發帖稱心寒曾俊華撐「8．31」，被網民質疑為何訟黨又捧曾呢？網上圖片反對派口中說不，身體很誠實，一有「造王」機會，就將自己否決政改方案時掛在口邊的「原則」擺埋一邊，興高采烈去玩「小圈子選舉」，原來係想「All in」薯片，要佢對抗中央。不過，其中的公民黨「貫徹始終」，留定後路，買晒大細圍骰，真係開邊瓣都立於不敗之地。
上屆立法會期間，公民黨各議員在改革醫委會的修訂條例二讀時有人投贊成，有人投反對，有人投棄權，相信大家都記憶猶新。不過，橋唔怕舊，在今年特首選舉提名期時，大部分人就撐薯片，郭家麒走去撐長毛，身為公民黨創黨副主席嘅黎廣德就以工程界選委身份一度撐胡國興，其後又話胡官係鬼，令人眼界大開。
提名期結束，公民黨未等所謂「民主300＋」開會就公開宣佈會「All in」薯片，好多人鬧爆佢哋「出賣傘運」。
郭家麒余若薇質疑薯撐「8．31」
不過，以為佢冇得繼續搬龍門？少年，你太年輕了。郭家麒近日就在fb發帖，話要「毋忘初衷」喎，「無論特首選舉的結果怎樣，3位特首候選人都是建制中人。沒有一位特首候選人承諾香港人撤回人大8．31方案，實現真普選。」
公民黨前主席余若薇也巧合地出招，在fb發帖稱，曾俊華在前晚的法律界論壇上「又再一次重覆（複）人大常委會8．31決定是香港法律一部分。我不能同意。......為什麼每次提到政改，曾俊華標準答案第一句就是說8．31決定是香港法律一部分？希望他競選辦中的法律顧問與他討論這問題。」■記者 羅旦
網民寸爆公民黨
Jimmy Lam：下（吓）？貴黨唔係話投假薯片咩？
Bobby Kwok：胡官咪反對8．31咯！
Kwokchun Cheng：公民黨咪又係投曾俊華，你可以要求佢承諾推動無8．31框架嘅政改，否則不提名不投票，你有冇做丫（吖）？嫌臭又要奶（舔），返去瞓啦！
Tony Chan：公民黨支持曾俊華，曾俊華支持8．31， 明白晒......一時就話要按民意，一時就話要按宗旨做事，龍門任你擺。 ■記者 羅旦