■低胸上陣的周汶錡自爆上圍跟未生前一樣，令她很失望。香港文匯報訊（記者 梁靜儀）剛誕下兒子不久的名模周汶錡(Kathy)，前晚出席瑞士腕錶及珠寶品牌伯爵絢麗Possession Lounge揭幕展覽，同場出席的還有林嘉欣、曹敏莉及王愛倫等。低胸上陣的她，自爆上圍跟未生前一樣，令她很失望。
坐完月不久即復工的Kathy，穿上白色tube dress現身，騷胸又騷腿，問到穿到咁性感不怕入風嗎？她笑說：「坐完月出關，做咩都得。」低胸上陣的她，自爆上圍跟未生前一樣，令她很失望：「諗住佗仔會升幾cup，好遺憾冇升到cup。」她表示今次都會餵人奶加奶粉。
每次出街大仔會扭計
極速收身的她表示全因在家中要做運動，她笑說：「大仔而家廿一個月大，識踩車好活躍，我要推車又要抱細仔，浪費好多精力比較忙，好似做運動咁。」她透露細仔剛滿月不久，比較惡湊又恰哥哥，聲線比哥哥惡啲，每日睇住佢成長，初時覺得佢似哥哥，而家就似老公，有時喊到力竭聲嘶，鍾意人抱，但她不想抱太多令他癡身。
她表示媽咪都有幫手湊孫，而她每次出街，大仔就會扭計，叫她剝衫剝鞋，痴纏十五分鐘才出到門口，不過她現在最怕大仔入廚房：「佢見到我的飾物會郁以為係玩具，整唔見戒指就大件事，佢𠵱家識去丟垃圾，試過將禮物丟垃圾桶，（有冇唔見嘢？）Touch wood冇，自己都好緊張，但佢會將我啲戒指丟咗，盡量唔畀佢入廚房，可能有些寶在垃圾桶。」
林嘉欣抗拒追多個
同場的林嘉欣近日頻頻出席藝術活動，她表示越來越多人知道她有這個興趣，而她年底又會與年輕藝術家合作搞畫展，至於會否變成第二個事業就不知了。問到嘉欣可有收藏品牌的首飾？嘉欣說：「都有收藏幾件，自己鍾意戴戒指，有冇鑽石的都有，用來襯牛仔褲，冇鑽石的唔係好貴，最緊要日常生活都用到，如果太大粒冇機會拎出來好浪費。」問到老公可有送首飾？嘉欣坦白說：「除咗結婚戒指就冇，每年母親節都叫佢唔好送，兩個孩子已經係最好禮物，今年母親節都會同屋企人食飯，媽咪會由台灣來港，三代同堂。」
至於工作方面，嘉欣透露經常都有洽談電影工作，但是否能開拍就要睇電影有冇資金。問到可會趁得閒追多個仔？她即抗拒說：「唔好呀，2係一個好數字，自己封咗肚四年，(有意外會否生？) 冇冇冇，有意外當然會生，但唔容許有意外，兩個囡讀大學時，老公都七十歲，因為佢五十歲先做爸爸，兩個夠晒數。」