■劉浩龍回到鄉下中山登台演出。香港文匯報訊 近大半年將工作重心投放在電影上的劉浩龍（師兄），完成與甄子丹、劉德華、姜皓文合作的新戲《追龍》後，稍後將投入另一套電影演出，日前師兄趁有空檔，回到鄉下中山登台演出，「返到自己鄉下做騷，真係會有份親切感，但今次經歷更特別，因為撞正勞動節假期，往中山嘅高速公路大塞車，我哋足足用咗6個鐘頭先去到目的地，塞車期間我同我同事又急尿，好在搵到廁所，如果唔係就弊家伙。」
提到即將開拍的新戲，師兄扮演一位電影巨星的動作指導。雖然電影題材以搞笑為主，師兄無需應付危險動作，但導演想師兄「唔打得、都睇得」，故要求他曬黑皮膚外，還要減肥兼練到手瓜起腱，「其實過去嘅聖誕同新年，我肥咗好多，尤其過年去日本旅行，足足肥咗10磅返香港，個肚腩肥到凸晒出嚟，自己都嚇一跳。」
慶幸師兄體質屬於「易肥易瘦」，在戒掉澱粉質的同時，每日再抽時間做運動，加上有張家輝御用健身教練從旁指導，過去兩個月師兄足足摵走21磅脂肪。「減肥對我其實唔難，反而未試過練大隻、練朱古力腹肌，就算拍完套戲，我打算繼續keep，再刻苦啲練埋腹肌。暑假左右會有新歌出，搵到合適場地年底有可能會開騷，我咁耐未試過做騷除衫，如果今次練得成，我唔介意晒自己排朱古力畀大家睇。」