柏寶今晚冇馬上陣，據馬會消息所得，當事人因為家庭問題請假一個月，剛剛周日贏場一級賽，即因為家庭問題返澳洲，希望唔好因為香港競爭激烈，萌生返澳洲念頭，不過，「詠紛繽紛」好大機會出戰六月四日安田紀念賽，屆時會否由柏寶騎抑或找雷神，相信這個配搭，短期之內將會傳得火熱。
今次跑谷草夜賽，通常場仔列陣，對細馬房都有多少着數，起碼有得講吓運，強倉抽到個衰檔，弱馬房便有偷雞條件。何良與徐雨石馬房喺呢次夜賽嘅備戰動態都較為特別，往往馬匹早課收操之後，再安排於馬場範圍遊車河，有此動態馬分別係何良「至尊無上」同徐雨石「天狼星」。
先講「天狼星」，周一下午呢匹馬被安排於馬場範圍遊車河，呢隻馬上次先至贏完谷草一千米，所以對賽道及路程一啲都唔會陌生，只係馬房事前做好一切鋪排工夫，等隻馬有出賽心理準備。上場「天狼星」贏谷草一千米，臨場由十三倍獨贏落到六點九倍，即係話有人對呢隻馬有信心可以喺呢個路程取勝，結果真係由巫顯東一放到底贏馬。今次「天狼星」換上黃皓楠披甲，昨朝倉主吩咐黃皓楠一早入馬房，並替這駒於馬房地堂踱步，同一時間馬房多安排一隻「敬無極」副練何敬森拍踱，兩隻馬踱起上嚟神態都非常生猛，而倉主似乎對黃皓楠仔隻「天狼星」狀態特別滿意，值得睇高一線。
至尊無上阿叻探班
何良馬房匹「至尊無上」，近期操練非常認真，早兩日下午，副練更親自為這駒於馬房內踱步，踱畢馬房更安排一架雙格運馬車接載這駒遊車河，雖然「至尊無上」並非第一次到跑馬地上陣，馬房有此安排，純粹是給這駒有一個出賽的訊號，令牠知道就快要出市區作賽。至於今次「至尊無上」所角逐的谷草一哩，過往雖然兩戰均無功，但以一隻質新馬而言，暫時未有戰功並唔代表唔識跑，睇上次田草千六米衝入第四走勢，末段衝得咁勁，本身狀態經已逐漸踏入水準，今次轉一轉場跑谷草一哩，對手無咁強，相信何良都計掂條數，形勢有利下俾呢隻馬開齋，另外大家不妨查一查「至尊無上」血統，乃「天狼星」一族，有乜理由跑馬地窄場唔識發揮。而昨早即周二，沙田馬場有十組大閘，阿叻亦有到場睇大閘，睇完大閘跟手入何良倉探馬主朋友隻「至尊無上」，動態咁積極，大家不妨留意吓。
破風者苗太摸住操
早前苗禮德喺南非買完馬，昨朝經已浦頭入倉，大約五點幾鐘經已見苗禮德兩公婆出現馬房，苗太戎裝一度替「破風者」踱步，而副練余詠詩亦有浦頭，佢則替「川河領駒」踱步，拍踱十餘分鐘，兩駒神態都非常活躍。「破風者」上場贏谷草千二米，姿態輕鬆，目前勇態保持，再下一城唔難。至於「川河領駒」，今次跑谷草一哩正中下懷，事關近期所跑幾場短途並非其最佳出擊路程，翻查呢隻馬來港前最後兩仗經已向千六米進軍，而且取得一冠一亞，所以今次跑一哩應該最合腳法，配上鬥志一流史卓豐，必然有料到。