蔡約翰今季新馬一出即勝例子唔少，好似「精算八方」、「天下為攻」同埋「旺蝦王」，都顯出練馬師嘅奶O同埋麾下馬匹超凡質素。不過，上述馬匹均有一個特點，就係出戰沙田。其實，過往蔡約翰亦安排過唔少新馬喺谷草作首戰，但能做到一出即勝者，成功率就認真麻麻，近兩三季僅得一匹「紅衣醒神」，能夠在第一季初出跑谷草一千米贏「威先生」，結果這匹PPG目前經已是一匹頂班好手，而且成為短途新貴。
當然，蔡約翰有唔少PPG首戰跑谷草都係敗興而回，好似「飛霞」、「喜悅繽紛」同埋「勁皇子」，首戰便是跑谷戰，均是無功而回，不過這些馬匹日後能交出好成績，「飛霞」同埋「喜悅繽紛」今季就大放異彩，而少部分首戰跑谷草未能取勝，卻能上名者日後成材機會亦大，「駿明珍寶」便是其中一例，呢隻馬今季已取三W，相信好多人都估唔到。
今次有隻類似「駿明珍寶」嘅馬就係「常豐裕」，上場初出跑谷草一千米，由雷神騎走位9 7 3，末段如飛將軍從天而降，取得一席第三名，頭二馬分別係「澤心星」同埋「海之濤」，兩匹都係谷草一千米好手，加上是重新降落四班上陣，「常豐裕」只係敗於兩匹超班對手蹄下，正如先前所講，「常豐裕」首次上陣，雖未竟全功，卻可以克服谷戰一定難度而上名，證明牠質居四班是上風分子，今次馬房安排牠轉戰田草千二米，這個安排相信非常有利隻馬發揮。
今次馬房雖然冇咗雷神可以用，但蔡約翰卻搵來好使好用嘅李寶利頂替雷神，此子上次替蔡廄嘅「天下為攻」一出即勝，備受幕後讚賞，倉主亦答允這位好手，適當時機將會盡力支持，雷神周日出戰日本，蔡廄旗下有分量馬匹即用上李寶利，李寶利為爭取倉主信任必定會盡砌。