李寶利今次賽事有好多惡馬喺手，皆因冇咗莫雷拉同潘頓，連蔡約翰都搵佢幫手，雖然韋紀力客串一日，過往蔡約翰都好喜歡搵佢，但呢次就特別重用李寶利。李寶利終於有機會大展拳腳，部分場合更出現有馬揀，好以第九場咁，李寶利揀咗騎「良才」，而上次由佢贏開嗰隻「積極皇」，呢次俾咗郭能騎，好多人以為佢被飛，實際係佢揀馬騎，而同場隻「勝利寶石」，上次亦係由李寶利爆入冷位，呢次一樣唔騎。講近績「積極皇」當然犀利，到目前為止跑四次獲兩冠一亞，落敗嗰場係跑千二米，今次雖然升班，但睇上賽贏四班過程，輕鬆咁贏對手兩個馬位，升上三班肯定無阻力。當然，李寶利唔騎「積極皇」，佢手上隻「良才」亦非善男信女，季內跑四場全部係直路賽，首場用韋達跑經已被馬迷捧成四倍半熱門，結果未有成績交出，翌仗再出轉手由韋紀力客串，立刻跟「翩翩」喺同一路程串Q，到第三仗上陣，改由雷神披甲，又跟「祥勝駿駒」串Q，不過到第四仗再出，雖然再用莫雷拉跑，但因跑到不良於行而熱倒。由二月十一日到六月四日，隻馬經過長時間休養，除腳患治癒外，近兩個月均在大閘過程中見到幕後安排呢隻馬做辣工夫，四月尾由雷神試課泥地千二米閘得第三名。到上月尾，可能雷神知道要跑安田，所以由李寶利接手試泥閘，結果輕鬆贏返嚟，假如呢次有番跟「翩翩」串Ｑ嗰場嘅氣勢，「積極皇」要過呢一關真係唔易。