麥偉利短短幾次在港上陣經已交出兩場頭馬，證明本身有功夫，立刻引來不少馬房垂青。今次夜賽，華洋馬房如大摩「花月流星」、李易達「美好家園」及徐雨石「當旺財」都交由他上陣，希望藉這位年青人嘅拚勁，替下風馬取得突破。
不過，最值得留意係隻「最驫」，上場呢隻馬配梁家俊跑谷草一千米，臨場七倍馬落到四倍半綠燈開跑，結果得第三名，輸俾「合作愉快」及「線路神駒」。呢隻馬來港前跑贏過四場，路程分別為一千米、千一米，千四米及千五米，雖然短途一千米有贏馬紀錄，但來港前所贏兩場，經已向中距離方面進取，所以呢隻馬並非正宗短途馬，上場谷草一千米上名已算牠本事，實際應該爭中距離路程會較理想。
當然，由於目前適應問題，跑中距離可能未及最佳水準爭勝，於是轉由短途起步，最近更轉向谷草短途上陣，一般而言谷戰短途水準較低，稍有質素嘅馬，均有機會喺窄場偷雞，上次跑谷草一千米，幕後亦本住呢個心態結果得第三名，今次馬房喺出擊路程上略作調整，替呢隻馬出戰谷草千二米，應該更合性能，而鞍上人亦由梁家俊換上麥偉利，因為倉主比較信邪，通常邊位騎師近期利佢嘅，往往會多提供坐騎俾佢發揮，麥偉利替「永旺年年」爆大冷門贏沙田銀瓶三級賽，倉主當然錫晒佢，所以今次隻「最驫」並非梁家俊揀騎，只係倉主想搵個旺人夾一夾，希望於季尾前能夠替隻馬打開勝門。
據有關消息所得，「最驫」自上次喺谷草一千米跑獲一席第三名後，復課快操工夫不多，有時晨課亦唔露面，其實，馬房只安排佢喺馬房內踱步儲火，間中亦只係拖隻馬到泳池游水，作一些比較悠閒運動，好待呢隻馬養足體力應付今戰，呢次「最驫」列陣嘅水準，如果同上場比較，肯定比入位時有過之而無不及。