目前睇馬經其實好過癮，蔡神仙、東尼仔、十三少、炒飯哥等，單係幫騎練起嗰啲外號既貼切，真令你會心微笑，近年除咗形容騎練之外，亦有用嚟形容馬主，蕭家軍、「美麗」系、「首飾」系、「牛精」系等等，多到數唔晒。所謂同主馬記得以前馬會限制每位馬主最多只可養兩隻，幾時改變限制就唔清楚，只覺得其實點解要限制呢？限制只會產生所謂嘅枱底馬！只要馬主負擔得起，養多幾隻又有乜問題？今次谷中賽事方面，除陣營最鼎盛蕭百君有「勢必跑」、「勁哥兒」及「馬克羅斯」一門三傑之外，王明澤家族都靜靜起革命，「正是你」、「進綵」、「確威風」及「好醒」一家四口馬齊齊配合而來，「正是你」就係王明澤夫婦名下，「進綵」就女兒王錦汶，後兩駒就屬於兒子王經緯，當中上述四駒季內尚未贏馬，「正是你」今季轉投李易達馬房後尚未贏，戰意一層不懷疑，可優先考慮。