今季賽事已進入倒數階段，大摩嘅頭馬成績被蔡約翰遠遠拋離，要重奪冠軍練馬師殊榮幾可肯定已無望，不過摩廄依然沒有放軟手腳之意，今個周日賽事此廄依然出馬踴躍，總共有十駒報名，全為正選身份，相信好有機會增添頭馬進帳。
今季喺三班田草二千米擊敗「威利熱流」取得頭馬嘅「蓮花巨星」（圖紅色綵衣），剛戰再爭同程，喺潘明輝胯下僅以頸位不敵「綠色勁駒」跑獲亞軍，今次轉戰千八米，大摩對隻馬嘅機會分析說：「呢匹英國自購馬雖然質素唔算太高，但勝在體健耐拚兼長期有作戰狀態，其實上場本來是有贏馬機會，可惜隻馬喺直路上受到騎師催策時出現內閃情況，加上接近終點前騎師喺馬鞍上失去平衡，最終只是以頸位輸俾頭馬『綠色勁駒』得亞軍，應勝變敗當然有點失望，不過跑馬就是這樣的，幸好隻馬復課狀態依然無走樣，上周四由祈普敦跳三段，祈普敦試完話隻馬末段騎落反應良好。而我稍為擔心是天氣問題，因為天文台預測周日將會下雨，隻馬過往跑咗兩次變化場地都落敗，不過就輸得唔遠，希望到時天氣唔會太壞，如果喺正常場地上角逐，我相信牠是有唔錯嘅機會，甚至乎能夠贏得季內第二Ｗ。」
「海翡翠」係上季大摩馬房嘅周歲精品，隻馬今季踏入三歲進步一日千里，今季到目前為止跑咗十二場已取得五場頭馬佳績，另有三次入位，唯一令人失望嘅一仗，就是大前仗喺谷草千二米因氣管有血包尾而回，剛戰由巫顯東策騎再戰谷草千二米重拾朝氣跑得季軍，今次移師四戰獲冠季軍各一次嘅田草千二米，大摩表示：「上場雖然陣上形勢對牠不利，因為早段不但未能取得領放位置，甚至要被迫走二疊，能取得季軍表現算不俗，起碼證明到早前氣管有血對牠冇乜太大影響，而隻馬最近配潘明輝參加跑馬地一千米試閘，結果由頭放到尾，以牠回程後大氣不喘的情況，可見牠的狀態良佳，而潘明輝對牠嘅評價也十分正面，只要到時場地狀況不太差嘅話，我預期牠會有精彩嘅演出。」
「多紅利」今季來港澳洲自購馬，至今賽過六戰仍未能打開勝利門，不過連仗均見有接近走勢，今次出戰三班千二米，大摩說：「此駒質素唔差，在澳洲四戰獲一冠兩季一第五，來港前最後一戰喺表列賽跑得季軍，只要訓練得宜，相信前景唔會太差，而此匹三歲馬季內經過多戰後狀態逐漸納回正軌，上周五由祈普敦快跳兩段，力度較前貫注，我相信牠今戰會有進步演出，甚至乎贏馬都唔奇。」