好多世界級運動高手，除咗本身技術了得，仲有一樣嘢好得，就係演戲，最令人津津樂道就係球王馬勒當拿嘅「上帝之手」，搵手拍咗個波入網，開心同隊友慶祝，完全呃晒球證與旁證，結果就咁贏咗英國晉身決賽周。又好似剛剛星期三跑完嗰次夜賽咁，雷神騎隻「高山威龍」，一起步俾潘頓隻「欖球鑽石」頂住咗個頭位，雷神別無他法，唯有焗住留喺「欖球鑽石」後面，不過雷神都醒目，未轉正彎經已上前拍實隻「欖球鑽石」，喺入直路最初一、二百米，雷神只係壓迫住隻「欖球鑽石」嚟跑，不過就喺近終點嗰二、三十米，「高山威龍」終於挨到「欖球鑽石」，當然呢個動作會唔會構成被告甩咁嚴重，最初馬迷未必會發覺，因為雷神贏馬後入凱旋門途中先跟欄邊馬迷來個五，高興之餘心情仲好輕鬆，完全唔將挨到人當一回事，所以連電視機旁嘅雷神擁躉都認為冇乜事，不過，研訊再加抗議符號出埋，之後研訊咗十幾分鐘，咁就知道大劑。如果唔睇慣賽馬，仲以為雷神贏咗，睇得多先知佢係一個高手，騎馬之外，仲係演戲高手添。
吳定強以為可以拉番場馬，呢舊擺咗落嘴邊嘅肥肉，到頭來要嘔番出嚟，都咪話唔戥佢肉赤。不過今次日賽佢隻「銘記心中」有望補番數。「銘記心中」馬主鄭是鳳一直支持開吳定強，今季即使吳定強未必能夠畢業，佢都冇轉倉念頭。其實「銘記心中」最近兩場跑千四米，經已有唔錯成績，一場輸俾「常妙星」，另一場輸俾「駿馬翹楚」。大家睇一睇，「銘記心中」喺呢個路程兩次得亞都係輸俾超班馬，今場要再搵隻超班馬鋸佢都幾難。再睇呢隻馬近兩周所做打磨工夫，上個禮拜跳過兩課快工夫，今周亦跳過兩課快工夫，可以話吳定強呢次戰馬中備戰最積極，明刀明槍要搏盡。