計埋今次仲有六次馬跑就歇暑，煞科賽期漸近對鄭俊偉嚟講係一個重大考驗，因為到目前為止佢只得十四場頭馬，仲欠兩場至畢業，啱啱跑完嗰次夜賽，鄭俊偉只出一匹「你同我定」，好似話俾大家聽，唔使擔心佢呢兩場頭馬，六次賽事，贏兩場馬只要有多少運氣，其實一啲都唔難。今次日賽，呢個倉戰馬大舉出動，其中第八場三路興兵，計有「金剛仔」、「嬴風雲」及「好力煌」，三隻馬都有機會爭功，「好力煌」及「嬴風雲」上次跑第二名，近況有水準，仲有隻實力未見底「金剛仔」，今季經已交出兩Ｗ，不過喺呢個非常時期，用盡一時都無可厚非，所以上述三隻實力馬中，「金剛仔」是有本錢再替馬房帶來另一W。喺鄭俊偉眼中，呢隻「金剛仔」仲有大把上升空間，點解咁講，大家可以睇睇隻馬前次贏田草千六米，可以跑贏「皇者勝利」及「福愛寶」，再數遠啲嘅賽事，就係贏「喜旺寶」同「南京之友」，呢隻點會係三班貨色，所以前次贏完千六米，立即跳程跑二千米，為咗減番贏馬所加磅位而改用黃皓楠，不過，呢次真係太高估咗「金剛仔」，畢竟連千八米都未上過名，一下子跳到二千米，輸咗返嚟都冇得怨。正所謂欲速則不達，鄭俊偉亦明白呢個道理，於是正頭正路同「金剛仔」報番千六米，當然，佢都驚有閃失，同一時間出埋近況都磨得銳利嘅「好力煌」及「嬴風雲」，睇嚟鄭俊偉對呢一場頭馬是志在必得，而「金剛仔」應屬主攻手。