第五場「金地飛客」轉戰泥地短途搵到出路，每次後發先至贏馬姿態確係勁，最近連勝三場可用勢如破竹來形容，沿留四班角逐便宜莫甚，屆時若交出水準料可再下一城。「樂多福」季初兩場草地輸到遠離真實，上次轉來泥地上陣以九十九倍大冷身份跑入第二名走勢極具威脅，今次轉用郭能操刀擺明車馬，有權介入戰團。
第六場「正本雄心」最近九場俱取得獎金名次，當起馬現居四班肯定尚未止境，今次起用韋達操刀料可隔紗再贏。「常豐裕」來港初出谷草一千米後追第三，熱身後上次易地跑田草千二米立即補中，賽後只加六分不算多，加程二百米更利追趕，四班過客可打疊贏。
第七場「勝得威」四歲自購馬今季來港已取得四場頭馬，跑千四米更係拿手好戲，賽前由潘頓試好大閘狀態保持銳利，對手唔多料可捧走精英盃。「澳斯卡」歷來四戰千四米全跑入三甲，今季未贏稍稍令人失望，今次由贏馬拍檔莫雷拉壓陣，估計可趕上尾班車。
第八場「美麗寶寶」今季同程四捷表現出色，上仗排外檔仍照贏如儀，今仗有好檔位可延續勝勢，用潘明輝減十磅不可輕視。「嬴風雲」連續兩仗於千六米跑第二僅負欠運，今仗檔位進一步內移形勢更佳，重配韋達執韁屬三甲前列分子。
第九場「魅力知友」上仗初戰泥地一哩即跑第二名，可見馬匹泥地性能不俗，今仗換上莫雷拉實力不減反增，縮程上陣仍屬爭勝要角。「公証揚鳴」今季兩戰泥地得一冠一亞軍，今季用得少體力充足，小休後態況更勇，屬今仗坐亞望冠分子。
第十場「福愛寶」上仗贏千四米表現猶有餘勁，今仗續用贏馬功臣潘明輝得減十磅之利，交出水準可再下一城，穩守尾門。「中華之光」季初跑千二米熱身後，上仗初戰千四米即勝，開竅後可期繼續進步，潘頓不放手有心再搏多一次。