雖然大約仲有半個月馬季先至結束，但馬圈人士有啲經已安排好節目，好似潘明輝咁，老竇雖然喺呂健威馬房打工，卻一早向賀廄班工作人員打定招呼，煞科後一兩日就會搵佢個仔請大家食飯，原來係多謝班馬房工友，成日幫忙佢個仔，等佢有咁多發展機會。而呢班馬房手足亦非常客氣，指潘明輝啱啱出道當騎師，唔使咁大陣仗要請食飯，要請都係阿頭作東，不過，潘明輝老竇好識做，點都卜定晒佢哋，咁又難怪輝仔咁受歡迎，除本身騎得之外，仲有個咁識得人情世故嘅老竇，正所謂雞脾打人牙骹軟，馬房上下又點會唔關照住輝仔。
講真輝仔的確唔易卜，手慢啲都冇得傾，好似姚本輝咁，隻「盈豐駿駒」上次交俾輝仔騎，好衰唔衰抽個十二檔，雖然輝仔努力，早段不惜耗力切入內欄，用且戰且走戰術，希望其他對手跑得唔好等執雞，果然呢場同樣用搶放戰術嘅大熱門馬「獻惑」，因第二段開得太快，未入彎經已腳仔軟，之後更無以為繼，「盈豐駿駒」諗住可以取其位而代之，但莫雷拉所騎隻「勇冠王」突然神勇，發揮強橫後上力，結果「盈豐駿駒」連續四次跑第二名。
今季呢隻馬都算黑，其實夾埋早前一次，已第五次跑得亞軍，由於上場明顯係輸檔位，所以跑完呢場後，姚本輝立刻向賀賢卜定輝仔，不過賀賢冇立刻應承，因為佢個倉都未知有乜馬報名，結果報名表公布後，「盈豐駿駒」報名四班一哩嗰場，賀賢亦有隻「誰不羨」報名，姚本輝一睇到，立刻命人走過隔離倉搵賀賢，確認可否借用輝仔，最後賀賢指出「誰不羨」會搵位大師傅騎（該駒排位後已退出），輝仔可以外借騎「盈豐駿駒」。所以今次「盈豐駿駒」搵得潘明輝上陣，幕後自會把握機會，而今次有啲運仔抽番個六檔起步，照計可以補中。