「和諧小子」自從轉跑谷草千二米後三戰三捷，呢隻馬本來係韋達私家騎，上次因韋達停賽益咗雷神，今次韋達可以上陣立即取回策騎權，即使由佢騎慣騎熟嘅「叫關健康」都肯讓埋俾雷神跑，自己一心一意騎番「和諧小子」，希望能夠替呢隻馬四連霸。不過同一時間同場列陣嗰隻「多多勁驥」，今次搵田泰安騎，雖然雷神隻「叫關健康」未必阻到韋達，但田泰安分分鐘可以當巨人殺手，而呢隻「多多勁驥」，絕對有權殺低「和諧小子」。「多多勁驥」有個脾性，就係狀態一回勇可以保留一段長時間，上季呢隻馬就曾經創出過一口氣連贏四場紀錄，到目前為止「多多勁驥」近季尾階段回勇後，經已先後由麥偉利及巫顯東贏過兩場，呢次升番上三班跑，雖然係一個實力考驗，因為上季呢隻馬上三班後即無再一步建樹，不過，正如之前所講，呢啲馬跑一道氣，目前咁好水準，加上輕磅之利，絕對有本錢可以更上一層樓。馬房呢次唔用巫顯東及麥偉利，當然有用意，正如上次連捷，用巫顯東刻意減磅安排，顯出馬房部署有心思，呢次馬房棄用兩個贏馬功臣，改用田泰安，因為田泰安騎到輕磅馬，另一個原因係田泰安上季贏過呢隻馬，仲係兩次咁多，所以性能如何，佢都十分清楚，講真上次巫顯東贏「多多勁驥」，起步麻麻哋，今次搵田泰安出馬，閘前反應一定可以同「和諧小子」鍊，而「多多勁驥」有機會與「和諧小子」看齊，贏得季內第三場頭馬。