今日沙田跑十場分別七草三泥回歸日賽事，草地以A加三跑道進行，頭場下午一時正開跑，兩場重頭戲分別係香港回歸盃及粵港盃。馬房方面，蘇偉賢及蔡約翰均派出不少惡馬參戰，值得優先留意。騎師方面，潘頓及潘明輝剛於周三夜賽包辦五W，此對旺人必要吼實，另外雷神今次也手執不少實力馬，亦要留意。
第一場、第四班、一二○○米（草地）。「魅力之子」唯一頭馬正在四班田草千二米建功，以三乘許彈離「線路神駒」，而今季跑過七場，前仗喺同程均速入Q；上仗改配火車潘跑好黏地，慢閘下後上不及；今仗再戰應見真章。
第二場、第五班、一二○○米（草地）。「金錢炮」五歲仔現評廿七分喺此群打滾必有優勢，今季兩度跑第三，已在勝利邊沿徘徊，上仗轉戰泥地千二，全程跟跑志不在此；今仗轉爭田草千二配旺人火車潘，當有拚勝之力。
第三場、第五班、一六五○米（泥地）。「金武士」季尾重返五班上陣之後，前仗出戰谷草一哩，沿途三疊望空兼轉彎踩油亦跑獲第六；到上周日出戰千四，加眼罩後上如狼似虎得第五；今鋪匆戰增程跑泥必有的放矢。
第四場､第三班、二○○○米（草地）。「特獎」近四仗由泥地千八跑起，均以狂風掃落葉姿態後上取勝，如前仗出爭田草四班二千米，末段極遲望空下，單憑兩三個箭步便趕過對手；上次增程至二千二百米，卻一早擺前走，入彎再加速掟甩對手輕勝一仗；今次交出水準應難尋對手。
第五場、第四班、一二○○米（草地）。「萬事醒」今季一出即在直路賽上名，除了反映性賦早熟，亦顯示路有專長，該役與「彪形猛漢」串Q，後駒勝後升上三班能夠多添兩W；上仗再爭直路賽，後上衝刺勁強得第五；今次轉爭千二對手非強，贏馬開齋可期。
第六場、第四班、一八○○米（泥地）。「曾幾何時」前仗初跑泥地兼增程一哩即入Q，跑濕慢地追勁討好，當要加點難度分；上仗有二檔幫手，結果輕勝對手開胡；四歲馬季初曾因傷休戰，季尾進度才逐漸重上軌道，相對體能方面較對手優勝，而今仗跑長百五米，保守估計仍具坐位望贏條件。
第七場、第二班、一四○○米（草地）。「劍斷浪」整季的狀態保持得穩定，唯一缺點就係多跑之下體重不斷下降，幸好晨課所見馬身未見瘦，相信戰鬥力依然保持上佳水平，今次相距上場有一個月足夠時間回復體力，埋門再試泥閘省馬，馬兒走來神態生猛，出腳有力，強勢再爭千四有力連捷。
第八場、第三班、一六五○米（泥地）。「金太陽」至今獲一贏三位分別在泥地千二及一哩取得，翻睇往績上季角逐谷草一哩跑得第六，所負不過三身位，但當時其狀態與進度擺明未足，也能於不合腳法的谷草交出似樣走勢，證明跑一哩路程合適，故此上仗增程泥地一哩入Q並不意外；今次再爭泥地此程可寄予厚望。
第九場、第三班、一四○○米（草地）。「靚紫荊」徐廄自購馬，一般此類分子來港後適應需時，但此駒卻有點例外，除初出一役在田草千二米表現平平之外，近三仗增程跑千四表現有板有眼，一再沿途走外疊而追得勁；今仗有大樹遮蔭，慎防冷門揭竿起義。
第十場、第三班、一二○○米（草地）。「財高八斗」質素不差，而且件頭夠大，前速又快，雖然腳法並不悅目，但跑落卻很實用，而且上仗四班升上三班也立即跑獲亞軍。其實對於這類腳法欠佳之馬，貼欄會跑得較順，而剛戰梁家俊採取放頭戰略已發揮出色，可惜遇上「駿明珍寶」神勇殺上未竟全功，今回操好再戰力求補中。