馬季越拉越長，暑期季比季短，經常都話人疲馬乏，剛周日四歲精英「巴基之星」都厭戰，到底是否跑得太密，馬兒當然唔識得講，但事實係，現時馬匹的平均出賽次數越來越多，跑來跑去都係同一批馬，街頭智慧一早有云，季初及季尾賽事較為難賭，事實季尾馬兒有可能隨時出現體力問題，而且並不容易在賽前搵到任何蛛絲馬跡，所以現階段真係要減注，留力下季重新出發會更好。另一方面，蔡約翰終憑「澳斯卡」於三級賽取得勝仗，打破一季練馬師在港贏馬最多紀錄，當日反高潮是蔡約翰身在海外，惟「澳斯卡」之勝，某程度可以令馬房在下季的一級賽增加籌碼，尤其在香港頂級馬處於交接時期更容易進一步成為王者，事實上，現時全港評分最高馬是「紅衣醒神」，就知道香港頂級馬處於一個很明顯的交替期。今次賽事睇好「南方快車」，抖夠操好安排在回歸日上陣，可替馬主揚威。