今季唔當副練嘅洪國興，據聞轉行當馬販，近日經已見番佢喺澳洲回流，上次日賽「公証揚鳴」轉入方嘉柏馬房即勝，賽後拉頭馬，洪國興亦有份影威威相，因為佢與馬主好老友，呢系馬以前一直支持呂健威馬房，主要原因係睇洪國興頭，當時佢依然係副練，隻馬有佢睇實，當然放心好多，宜家佢唔做副練，自然搵其他馬房訓練，咁啱方仔又有意思收呢隻馬，所以台前幕後就咁樣一拍即合。興叔好有人緣，贏馬當然唔會虧待班馬房手足，據云贏馬該位馬房助理兩隻金牛，騎馬人及副練紅錢更唔止呢個數，所以個個員工見到興叔有份幫馬主打理啲馬都會份外精神，贏馬大家開心，就係咁簡單。
話說今次日賽，洪國興又有隻由佢幫馬主手打理嘅馬上場，呢隻就係「大輝寶」，該駒轉投方嘉柏嘅性質與「公証揚鳴」一樣，而呢隻馬亦都係轉倉即勝，雖然近兩仗無功，但所跑兩個路程，一場田草千四米，擺明長咗啲，另一場泥地千二米，則場地性能未明朗，馬房咁樣部署，只係測試馬匹性質，今次報回贏馬路程田草千二米，希望煞科之前再替馬主贏馬，獎金袋袋平安。喺周四排位日，方廄下午安排三隻戰馬到機坪踱步，分別係「赤兔寶駒」魯柏軒、「大輝寶」張德明及「勢必跑」何澤堯，先踱步十餘分鐘，然後由鞍上人騎住到亮相圈遊花園，之後安排三駒到馬醫院照鼻。倉內手足指「赤兔寶駒」成身烏卒卒，狀態非常吸引，另外「大輝寶」火氣十足，三駒中以呢兩匹馬最吸引，必定屬馬房出擊主力。
金太陽泥戰大爆發
苗禮德近日對兩隻泥地戰馬相當緊張，分別係「金太陽」及「大爆發」。呢幾日下午兩匹馬好似孖公仔咁，經常由副練余詠詩及苗太於沙圈地堂踱步，余詠詩多數替「金太陽」踱步，苗太則替「大爆發」踱，兩隻馬踱嚟神生火旺，「金太陽」有時仲會起晒心火，鞍上人要大力扯到實，呢隻馬上場初跑泥地一哩，後勁一樣咁強得亞軍，汲取過經驗後，今次應該會跑得更好。至於「大爆發」季內贏過兩場，分別係泥地同谷草一哩，上次馬房以為隻馬跑泥地千八米應該冇問題，點知跑到影都冇，賽後馬會都未話仄馬匹健康，馬房經已第一時間到獸醫房要求替呢隻馬驗血，知悉冇問題，今次臨出賽前，馬房再安排呢隻馬驗血，知悉一切冇問題才放心，馬房亦都唔搞咁多嘢，正正經經咁同呢隻馬出戰番贏馬路程泥地一哩，睇動態應該又係搏命格，不妨再追。
金如意長途顯實力
蘇保羅今次有一對馬大家要留神，就係「一帆風順」及「金如意」，喺周四午間倉主安排呢對馬到機坪踱步，「一帆風順」搵巫顯東，「金如意」用副練伍鵬志，兩駒一路踱步，倉主則喺欄邊睇到實，「一帆風順」巫顯東將條韁繩收到短一短，唔俾匹馬走甩，結果走得非常流暢兼聽教聽話。至於隻「金如意」，精神集中好多，而且馬身肌肉收實，進步一日千里，兩隻馬拍踱完畢，再到亮相圈兜多一陣，希望令兩駒知道又快要開上戰場，做足一啲心理準備，而蘇廄手足對呢兩駒都好有信心可以交出好成績。