早排英國舉行雅士谷連場大戰，先有高雲地利、皇席及聖詹姆士皇宮錦標，繼而又有大不列顛錦標等等越洋賽事作直播受注，講真當地賽事郁吓二十幾匹馬，彼邦冇晨操片睇，就算有績可稽，都唔係好清楚點樣揀馬，問過一啲旅居英國嘅朋友，佢哋話只抱玩樂性質，所謂刨馬只係求求其，就算想認真亦認真唔嚟，一來唔專業，二來出馬太多，根本唔計得咁多。但香港呢邊就唔同，征服難度贏到錢特別有滿足感，再另類啲，就係從中物色自購馬一群，好似大摩的兒子喬治，晨早經已飛咗過去英國觀戰，當一吼準目標就開價，如上年的「喜旺寶」，原馬主或練馬師有意思，即同時搵獸醫驗馬，可以想像不久之後，就會有消息某馬主或練馬師買咗邊隻馬咁。至於喺地球另一端，澳洲大賽高潮已過，好些大賽分子既有幕後主動放盤，亦有港方問價，好似有匹昆士蘭二級賽季軍，有人開出千萬港元，佢哋都唔肯賣，除咗練馬師要求保留之外，而且馬主團體經理人正是佢老婆，變咗手執買賣主導權。聽好些本港練馬師與準馬主講，團體馬匹因為涉及股份多，每每要對方一致同意割愛，仲要出價吸引先至有得傾，所以九成九都買唔到，萬一佢哋個個同意放手，可能馬匹內裡另有問題，反而要諗過度過。
