香港文匯報訊 顏卓靈（Cherry）日前拍攝新歌《惡女》MV，其中一個造型就是她以火紅色眼影、硬崩崩假髮、黑白分明服裝示人，加上一副生人勿近的表情，炎炎夏日都有一陣寒意入骨！Cherry 說：「大家見我有些肉地好可愛，又有隻爆牙，好似好開心咁，其實真正的我唔似表面咁。外表係天生，但內心和性格係好個人。我呢個人生得太可愛，成日都被『標籤』好開心、好陽光，仲跳埋舞跳跳紥，其實另一面嘅我成日會胡思亂想，又會好惡，反差太大，會令人好驚訝！藉住呢首歌我想同大家講，我份人就係咁㗎啦，未睇清楚我真面目之前，唔好貿貿然就話鍾意我。不過，之所以我會展示咁真實惡樣的人，都係我好珍惜、珍貴的人！」而「見識」最多Cherry真面目的人，當然是最親的媽咪，她自爆小時候經常與媽咪吵架，曾經一次發脾氣大力閂門夾傷媽咪隻手，非常難忘！
此外，Cherry透露MV裡另有一個較溫柔的造型，為此她特別抽了幾日學跳現代舞。Cherry最近亦接觸了Pole Dance（鋼管舞），她說：「表面上跳Pole Dance的女仔好性感、好優美，其實着得咁性感係要用大髀和手臂的肉『啜』住支鋼管，我嘗試上鋼管2秒，嘩！好痛好痛呀！我諗我要多啲時間去克服和學習先至可以表演畀大家睇。」