反對派力反「一地兩檢」，但又唔肯面對現實去西九總站同石崗列車停放處參觀一下，到建制派立法會議員參觀完，又仆出嚟發聲明，結果就真係「仆低」。民主黨立法會議員涂謹申噚日下晝發新聞稿，鬧爆港鐵職員無法代政府講「一地兩檢」，但又質疑今次安排係特區政府「企圖淡化」喎。不過，喺妗u短200幾字嘅其中一段，竟然有3個錯處，包括將「一地兩檢」講成「一兩地檢」同「一地兩核檢」，連被佢哋視為「港鐵職員」都唔夠格嘅港鐵主席馬時亨個「亨」都寫成「享」，睇嚟真係好氣急敗壞喎。
馬時亨變馬時「享」
涂謹申自己唔肯去親眼睇下西九站都算，趕住發新聞稿鬧人都睇多兩次吖。呢頭話港鐵職員唔係政府唔肯去聽人講解，嗰頭又話個公關show係政府「企圖淡化」，到底佢哋覺得港鐵講西九有冇代表性呢？佢段新聞稿仲霸道到鬧埋去睇高鐵站嘅建制議員，話佢哋「只顧與馬時『享』和高鐵列車Selfie（自拍）」，再老屈建制唔關心高鐵興建費用同「一地兩核檢」喎。佢仲叫建制議員要「記住自己的身份」、唔好忙於「將相片上載至facebook」，真係唔知仲以為佢轉咗行去做訓導老師。 ■香港文匯報記者 甘瑜