■四哥原來每日都玩倒吊。香港文匯報訊 「四哥」謝賢被喻為是城中「Chok王之王」，最近他接受《天下第一Friend》節目訪問，親自解開Chok爆兼不老之謎！原來四哥家有倒吊機，他以招牌笑聲朗朗笑道：「我日日都要吊幾次！」
據知倒掛身體可促進血液循環，四哥年屆八十，仍有一頭濃密頭髮，是否跟倒吊有關？他承認說：「早年我本來有一撮白髮，後來吊吊下就無咗，都幾神奇！不過我媽媽102歲過身時，都有好多頭髮，而且仲係灰色嘅，我希望第日都可以好似佢咁！」
四哥每日玩倒吊，還邊吊邊拍打臉部減少皺紋，至於飲食和生活作息，他坦白說：「我乜都食，從來唔戒口，以前仲會打通宵牌，現在得閒就去行吓山。醫生幫我定期檢查，各種指數都正常，我應該仲可以撈多2、3年嘅，哈哈！」
對於被指Chok，四哥自言從來沒有刻意去經營，他說：「我只係因為做呢行唔可以失禮人，所以打扮吓，Chok係人地覺得！」問他覺得自己和謝霆鋒誰更Chok？四哥笑道：「我係老人Chok，佢係年輕Chok！」
不滿被封「溝女王」
四哥原名謝家鈺，入行後花名一大堆，包括「阿腎」。四哥解釋道：「以前我好百厭，開工成日玩，前輩咪話我腎腎地囉，耐咗索性叫我阿腎！」當年四哥由家姐看到招聘廣告推薦他入行，頭一部戲片酬有150大元，足夠普通人家1個月的消費，未幾四哥已經紅透半邊天。
四哥不諱言事業上也遇過低潮期，他說：「光藝結業後，李翰祥簽咗我去台灣，頭一年無戲拍，第二年同甄珍拍咗部戲，之後我就回流返香港開公司。」當年四哥和甄珍拍拖4年結婚，但婚姻只維持一年便告終。
四哥不滿地說：「成日話我係溝女王，其實我好專一㗎！成世人都只拍過5次拖，仲要次次都係俾人撇，陰功！不過我傷心都係兩日，第三日已經唔記得晒，可以繼續出去玩，唔係我點可以仲生存到現在呀？哈哈！」