今季大摩請咗貝湯美做主帥，好多人以為莫雷拉未必會再受呢位盃王重用，其實大摩過往經已使出過唔少魔法幻影出嚟，大家以為必然主力，其實係配角，好典型嘅例子，就係何澤堯替呢個馬房爆隻「彩福」，大家又會唔會諗到大摩絕到咁，唔用過江龍，搵本地薑搏命。
講真莫雷拉真係同大摩好老友，上個禮拜喺日本札榥所舉行嘅世界明星騎師賽，大摩兩公婆同埋包大偉專登到日本睇莫雷拉出賽，雷神當日未失威，結果交出兩場頭馬，睇大摩同雷神咁好感情，新季未必靠晒貝湯美食胡。不過，有口痕友同貝湯美計過數，馬主每個月俾三千蚊主帥費，以現時大摩養馬量達五十駒，月薪已有十五萬，再計埋總獎金，大摩最近七季，每季平均獎金都有一億，當貝湯美騎九成大摩馬上陣，呢一季暫時粗粗哋計大摩都有一億，騎師有一成落袋，即係九百萬，連同十個月嘅薪金，即係有成千萬落袋。貝湯美喺雷神未來港前，大摩已有意思搵佢當主帥，但因為佢結婚後仔女仲細，考慮到老婆要照顧一對仔女，貝湯美就唔考慮離鄉別井，宜家一切定晒先至來港發展。當然，大摩一把年紀，再當練馬師日子都唔會太長，但以貝湯美功夫，要留港發展一定冇問題，攞公司牌當然夠晒資格，只要佢騎完一季有晒成績，發牌小組向佢發牌，大家都心服口服。大家睇睇呢次開鑼日特首盃大摩即俾隻「駿皇綵」上陣，呢隻馬上季一口氣連贏四場，評分上到一班，雖然跑兩場級際賽都未能夠贏，但兩場都跑得接近，一場千二米沙田銀瓶國際三級賽得第四名；另一場精英盃國際三級賽表現進一步，得第三名，只係輸俾「澳斯卡」同「勝得威」，但踏入今季，呢隻馬成熟程度更進，所以一般一班對手應該唔係佢手腳。貝湯美有望靠呢隻馬捧盃響頭炮。