呢個星期二，姚本輝午間安排喺馬房內進行拜神儀式，希望開季順順利利，當然有好成績交出亦相當重要，當日有唔少馬主亦來高興一番，不過熱鬧還熱鬧，仲未埋位進行拜神儀式前，馬房內部工作照樣積極進行，巫顯東同黃皓楠就最醒目，幫手操吓馬。而呢次姚廄嘅「奮鬥雄心」，巫顯東就喺馬房地堂踱步，馬房手足講呢隻馬狀態真係相當弗，跑千四米亦非常拿手，只嫌二班賽冇乜着數，最多都係冷P當W賭。至於黃皓楠經常操開隻「平天下」，情況亦差唔多，所以唔夠膽介紹俾大家賭W。不過呢日拜神，有個特別鏡頭出現，柏寶呢日都有份出席馬房拜神儀式，佢入到馬房，目不轉睛睇隻第五班馬「阿姆利則」，事關呢隻馬喺地堂由助手踱緊步，佢就企埋欄邊睇，之後又問有關人員，呢隻馬近期食料情況，當然呢類咁仔細問題，定要相關人至答到，好彩有個經常留意開呢隻馬嘅工作人員，知道隻馬嘅狀況，話餐餐掃清。「阿姆利則」呢隻馬係乜料真係唔多清楚，前季新馬班初出跑千二米即得第三名，大家以為佢係短途馬，其實非也，上季將呢隻馬由中短離試到大長途，由千四米跑到二千二百米，結果都係覺得呢隻馬跑千六至千八米會係最佳射程，呢次季初第一仗列陣千六米，呢個賽程當然有實力一爭，而姚本輝一早搵定柏寶騎呢隻馬，睇呢對騎練都互相咁重視呢匹低班馬，大家不妨諗諗佢，柏寶呢種蛤蟆功，一定可以砌得起呢隻馬。