■網民爆料話戴妖將「走佬去美國」。 網上截圖叫人衝，自己真係要鬆？自「雙學三丑」被法院改判監禁後，同樣面對多項相關控罪的「佔中三丑」之一大妖廷（戴耀廷）就發晒矛咁試圖為自己開脫。近日，網絡流傳不具名嘅消息，話據聞大妖怕罪成，正搭路想走佬去美國，仲要去哈佛大學教書喎！不少網民聞此消息都話好行夾唔送，但唔少人就質疑消息的可信性，話以大妖嘅料子點去哈佛教書呀！有人仲話，你喺香港搞「抗命」，美國梗係歡迎啦，但就絕唔會歡迎大妖去美國搞「抗命」囉！
網民「stevenlau4」周五（1日）喺「香港討論區」以「驚爆猛料：戴耀廷淆底 就嚟走佬去美國」為題發帖，稱自己「同港大法律系嘅老友傾偈」，對方話大妖因為「雙學三丑」判監，加上被不少市民批評及要求「革佢職」等「壓力」下顯得「情緒低落」。
傳「坐監前快離港」 李柱銘薦哈佛
他續稱，其「老友」仲話，大妖被控「串謀公眾妨擾」、「煽惑他人公眾妨擾」及「煽惑他人煽惑公眾妨擾」罪的案件本月19日提堂，「戴耀廷好大機會同黃之鋒咁坐監，留有刑事案底，仲可能俾港大革職。聽聞戴耀廷只想喺坐監前，快啲離開香港，又私下請（民主黨創黨主席）李柱銘推薦去美國哈佛大學教書。」
「等美國政府收佢，唔使等天收」
呢啲傳言，真係信不信由你。網民「sylm01」留言道：「係真就好，快d（啲）走！」「fb5663467」則稱：「快些搭路俾（畀）佢去美國教書，毒害美國青少年，等美國政府收佢，到時唔駛（使）等天收。」「bigboy2」就引用公民黨黨魁楊岳橋話「雙學三丑」坐監有更精彩嘅人生的「名句」，揶揄道：「走？明明可以有更精彩人生㗎！」
有網民就「反對」。「solar169」批評道：「攪（搞）到香港一鑊粥，當初聲大大叫人地（哋）仔女上火線，大班後生仔聽你老點之後仲受緊靶，自己嗰啲（仔女）就收收埋埋，依（𠵱）家自己仲想一走了之走數？」「肥通」也稱：「攪（搞）屎棍離開香港無問題！不過要找數先！」
不過，唔少網民都唔係咁話呢則傳聞。「dididada29」就質疑：「佢夠班去哈佛咩！咪吹到咁大好喎！」「LauLQ」也說：「佢（大妖）搞咁多野（嘢）原因係就係佢驚比（俾）人炒，搞左（咗）咁多野（嘢），學校先唔炒得佢，唔係又變政治打壓，基本佢就係大贏家，你班傻仔拉佢定啦，炒喎，咁易咩。」
「jacob_bb」也質疑道：「老尾（美）邊有咁蠢捉隻老鼠入米缸？哈佛教書？教咩都唔會教法律掛（啩）！教到d（啲）學生暴亂犯法，法律第二？老尾（美）才唔會想哈佛世界排名暴跌囉！」「香港之恥6」也說：「美國政府當然大力支持叫外國市民違法達義。當對美國本土市民就叫佢地（哋）必須守法！你估有沒有可能比（畀）你去美國一流大學教法律！」
■香港文匯報記者 羅旦