■甘迺迪人權中心一度串錯河童個名做「Jeffrey」，到廿粒鐘之後先改返。 fb截圖已故美國總統約翰．甘迺迪個姪女、所謂「人權分子」嘅嘉里．甘迺迪（Kerry Kennedy），日前寫信支持喺入面坐緊嘅河童（黃之鋒），攞河童嚟同已故美國民權領袖馬丁路德金相提並論，話兩個人「不相伯仲」！咁都未算最離譜，佢做主席嘅羅拔．甘迺迪公義及人權中心（Robert F. Kennedy Human Rights），喺facebook轉載佢封信嘅時候，一度串錯咗河童個英文名！
事緣中心喺個post（帖文）度話，佢哋關注一個叫「Jeffrey Wong」嘅中國活躍分子被判入獄，搞到網民要睇埋嘉里．甘迺迪封信嗰句「Dear Joshua」，先知係講緊英文名叫Joshua嘅河童。喺香港做緊傳媒嘅麥固崙（Aaron Mc Nicholas），就留言提醒佢哋串錯河童個名，不過佢哋要到出post成廿粒鐘之後先改返啱。
另外，個post又介紹河童係「中國活躍分子」（a Chinese activist），唔知對於「中國」呢兩隻字嗤之以鼻嘅河童，會唔會嬲豬到想撕爛封信呢？
■香港文匯報記者 陳庭佳