■胡楓扮老夫子，Bob扮大番薯。香港文匯報訊（記者 植植）胡楓（修哥）和林盛斌（阿BOB）昨日到屯門出席全港首個以《老夫子》漫畫為主題的跑步比賽的記者會，修哥及阿Bob分別以老夫子及大番薯造型示人，胡楓表示細細個就睇呢個漫畫，之後就到自己個仔睇。問修哥到時會落場跑？他說：「個活動有六千人參加，我到時就跑吓，其實我一路都有跑開，因為明年二月開演唱會，我要練氣。（搵齊『4個小生』同台Jam歌？）我的人情卡已經碌晒，所以請嘉賓會交畀製作人負責，佢有提議過『4個小生』，但我唔理，我專心練歌，公司去約啦！」
Bob表示試呢一身大番薯造型的時候，雖然女女全已瞓覺，畀唔到她們睇。Bob說：「但她們之前都講過話：『爸爸你好似大番薯呀！』咁又係，我個光頭都幾似，帶她們去跑就未必，但到時都會有啲攤位、嘉年華會適合她們，最近我都有同老婆商量過，計劃以後每個月定一日，同三個女一齊去做慈善，她們都算係幸福，希望等她們都知道社會上有好多需要幫助嘅人，至於我個仔現在只識食同瞓，等佢再大個些先預埋佢。」