呢個禮拜日，日本東京競馬場舉行日本短途馬錦標，呢項錦標香港馬都贏過兩屆，有○五年「精英大師」奪魁，到咗一○年，香港馬又以「極奇妙」取勝，兩次冠軍相隔五年，如今再數手指，經已距上次奪冠相隔七年，今屆香港隊派「有得威」出戰，練馬師姚本輝有過爆「極奇妙」經驗，所以點樣準備「有得威」大家可以放心。最初姚本輝曾經搵過田泰安騎「有得威」，點知呢位仁兄推庄，之後再搵李寶利，但李寶利要睇住老婆，搞搞下最後搵巫斯義跑，巫斯義乃李寶利外父，女婿知道有筍嘢，自己騎唔到當然想益外父。不過，有消息傳出巫斯義經已同歐洲嗰邊嘅鳳凰城集團解約，老巫只係當咗短短四個月主帥，贏咗四場頭馬就結束賓主關係，點解巫斯義跟呢個集團解約，贏馬少是否原因之一就不得而知，但其中一樣乃集團想巫斯義花多啲時間喺馬房內部運作上，其實，巫斯義來香港搵食咁耐，相信對台前較有興趣，至於走到幕後做師爺，真係未必係佢杯茶，賓主兩方面合作有矛盾出現，關係自然好難維持，合則來不合則去。
巫斯義接受姚本輝聘約後，佢星期一已由法國飛去日本，盡早替呢隻「有得威」備戰，相信冇乜大師傅好似老巫咁，一早替戰馬咁勤力打磨，據當地姚廄馬房手足透露，每次當巫斯義操完「有得威」，佢向倉主匯報，呢隻馬狀態冇得彈，其實巫斯義並唔係第一次騎「有得威」，呢隻馬第一季來港，即一四至一五馬季，「有得威」共贏出三場，其中一場就係由巫斯義取勝，所以對呢隻馬特性，老巫心裡有數。今季隻馬雖已六歲，但睇季初特首盃一戰只輸俾「四季旺」獲亞軍，證明戰鬥力仍強盛，今次日本仔所派短途馬冇「龍王」呢類級數對手，「有得威」真係有機會喺日本捧盃威威。