呢個禮拜日本嗰邊有場日本短途馬錦標舉行，香港派出「有得威」應戰，呢隻馬用上巫斯義跑，呢個組合都可以話一波幾折，巫斯義應該係執第五攤，點解咁講，原本「有得威」幕後想搵雷神出馬，點知雷神唔制，之後再搵潘頓又被推庄，跟進搵田泰安，田泰安亦都唔騎，再搵李寶利又話唔制，最後先至請巫斯義跑。上述四位香港騎師唔去日本跑，顯然對「有得威」唔係咁有信心，講真呢個禮拜香港有兩場三級賽跑，各場總獎金三百萬，頭馬獎金有百七萬，唔覺意兩場都贏晒，獎金都幾和味，難怪幾位騎師都唔肯去，果然有道理。田泰安推庄「有得威」時，講明想騎「翩翩」爭國慶盃，所以吼田泰安坐騎，「翩翩」應係首匹追捧目標。儘管同場雷神有「紅衣醒神」披甲，但講近況及準備工夫，「翩翩」真係對晒辦。暑期後「翩翩」一直保持正常操練，到九月份，馬房安排隻馬彈兩課大閘，第一課大閘，由何澤堯試泥地一○五○米，走位4 3 3，呢課試閘第一名馬係「實力飛駒」、第二名「紅衣醒神」，第三名先係「翩翩」。試完呢課泥地大閘，相隔一個禮拜，再安排隻馬彈多課泥地大閘，呢課閘由田泰安試，走位1 1 2，起步搶出，「紅衣醒神」吊住第二位，入到直路鞍上人沉身拖實，「紅衣醒神」先由外檔徐徐拍上越過，雖然呢課大閘「翩翩」只得第二名，但走勢輕鬆過「紅衣醒神」，難怪田泰安連「有得威」都唔騎，的確有道理。