現今大馬主多的是，由於個人養馬額經已開放到可養四隻馬，除「美麗」系及蕭家軍個家族養馬聲勢浩大外，其實近年有唔少馬主亦密密加強陣容，好似呢次日賽咁，有兩個養馬家族，出馬唔少得過「美麗」系及蕭家軍，呢兩個家族分別係「先生」系同埋「川河」系，「先生」系以史立德為首家族，史立德自己養有「索先生」，同佢老婆又夾份養咗隻「真先生」，女兒史佩加養有「靚加加」，公子亦有「友情人」及「威先生」。呢次日賽，「真先生」、「友情人」、「威先生」、「靚先生」及「索先生」都有份上陣，除此之外，史立德加盟香港電子業商會賽馬團體隻「電子群英」亦有份上陣，史家兵團呢日真係唔講得笑。大家睇完史家兵團咁強陣之餘，仲有「川河」系都唔講得笑，「川河尊駒」（圖7號）、「川河主駒」、「川河寶駒」及「川河領駒」，何家駒四駒齊發，除「川河主駒」馬主何夾個仔外，其餘三隻都係用自己名，咁強陣容相信唔會冇頭馬拉咁失威啩。「川河主駒」及「川河領駒」進度唔係咁足；「川河尊駒」及「川河寶駒」均擅谷戰爭成績，今日當然屬「川河」系出擊主力，如果數機會最突出馬，一定要先睇「川河尊駒」，上場配田泰安出戰田草千二米，雖然排十三檔，但陣上走勢一樣強勁，「平湖之星」雖然勝出，但過程都咪話唔驚險。因為贏馬過程之中，末段走勢威脅得「平湖之星」最緊要就係呢隻「川河尊駒」，最終田泰安騎到一絕都係輸一個頭跑得亞軍。大家再睇睇，呢隻馬上季贏谷草千二米，根本贏到「順勢寶」呢類谷戰專家冇得鬥，今次馬房安排番隻馬跑谷草千二米，即係話俾大家聽，雞胡都照搶，所以今次「川河」系馬，呢隻「川河尊駒」最有機會幫幕後攞威。