今屆日本打吡冠軍「金之霸」，相信有留意開日本馬壇嘅朋友都知道呢隻馬幾咁犀利，日前有消息傳出，隻馬俾香港「錶之星」馬主洽購成功，成交價千五萬，十二月運嚟香港上陣，呢隻三歲雄馬，過埋一月份就踏入四歲，「錶之星」馬主買隻馬嚟香港，會唔會想拿拿臨同隻馬安排跑香港打吡呢，如果照計數，咁貴買隻馬返嚟，當然有乜大賽都安排佢上陣啦，贏錢又贏面。不過有消息透露，呢隻馬仲未打定主意加盟邊個倉，有心水清馬房手足指，好有機會拉入羅富全個倉，因為今季「錶之星」馬主太太有隻「錶之勁」拉入羅富全個倉，但跑咗場唔掂即刻退役，所以呢系馬仲有個額補購。假如「金之霸」真係入羅富全個倉都係好合理，事關呢位新紮練馬師真係有一套工夫，「辣得寶」呢類難贏嘅馬都俾妢d掂。睇睇呢個禮拜日，羅富全又有隻五班馬等住交代，呢隻就係「勁風」，照計「勁風」會比「銘記心中」、「辣得寶」、「七彩」、「鑽之友」及「喜之星」強，因為「勁風」以前在四班跑泥賽，可跟「喜得龍」及「金太陽」呢類泥地好手鬥吓，今季羅富全接手，連續兩次安排「勁風」跑谷草千二米，如果對呢隻馬唔係有另一番見解，相信唔會咁樣部署，再睇呢位仁兄，捉摸啲無厘頭馬好有心得，「七彩」贏一千米直路賽，「喜之星」田草千六一擊得手，佢都有心得，大家不妨睇睇呢個禮拜日，佢點炮製「勁風」喺草地賽打開勝門。