■鄺俊宇facebook的帖子。 fb截圖有圖冇真相嘅年代，任何人都好容易被謠言謀殺，但估唔到連立法會議員都加入埋煽風點火，講緊嘅就係鴿黨（民主黨）嘅鄺俊宇。元朗一間賣羊肉嘅食肆日前被指賣狗肉，同時身為元朗區議員嘅鄺俊宇上星期五就即刻衝出嚟喺facebook發帖，話要跟進事件，已經去信警方，仲叫大家廣傳訊息，幫手「搜證」。結果，有關消息證實係流料，但個老闆已經不堪其擾要關門休息兩日。而鄺俊宇亦都潛水兩日，直到噚晚都冇澄清返件事或道歉。唔少網民都留言鬧爆鄺俊宇不負責任，有人更氣憤批評︰「作為議員未查清楚，語氣已經假定人有罪話要『搜證』，真係好不負責任的行為。」 ■香港文匯報記者 甘瑜
日前網上有流言話元朗有間食肆賣狗肉，仲影咗一具動物屍體，聲稱係狗屍咁話。一般人見到網上嘅嘢都唔會信到十足，但鄺俊宇明顯唔係一般人，即刻跑去自己fb出文，聲稱自己就事件「收到不少網友的求助」，「我們正跟進並求証（證）真偽，同步已去信警方促調查。我們需要尋找與此案相關的資料，以便採取下一步行動，請各位協助廣傳訊息，若有資料，請聯絡我們，謝謝大家。」佢仲驚死街坊睇完無動於衷，整埋張圖出嚟，仲話自己「搜証（證）中」。有網民就留言支持︰「-定要處理事件，救狗狗出來。」
食肆出示單據證賣羊肉
不過，件事話都冇咁快就澄清咗係流料，食肆老闆攞埋單據出嚟，證明自己嘅貨真係羊肉，警方亦都表示初步認為不涉刑事成分。雖然係咁，個老闆接受傳媒訪問嘅時候都喊晒口，話自己日日辛勤做嘢，唔明點解接連俾人騷擾，又唔點名批評鄺俊宇未問清楚就講。老闆仲話，件事發生之後瞓都瞓唔着，仲關咗門兩日「休息」下。
咁嘅情況下，鄺俊宇如果有承擔，就應該喺fb度出文道歉加幫人澄清返啦，但鄺俊宇並冇咁做，自從嗰日之後就深潛到不見蹤影，至噚晚8點半都冇任何表情，但鬧人篇文仍然高掛喺fb。
網民斥「政棍可恥」
對於呢種咁不負責任嘅行為，唔少網民都留言鬧爆，篇文700個反應入面，超過400個都係嬲。「Robert Law」就話︰「我覺得一啲不負責任、嘩（譁）眾取寵同一切以政治利益為先嘅低級議員，搵到一條以動物權益可以得到政治利益嘅方程式之後，就重施故伎，完全罔顧客觀事實，未經查證就可以含血噴人。香港可悲，政棍可恥。」
唔少人都鬧鄺俊宇為咗抽水腦都唔用，「Wong May May」就質疑︰「香港會有人明目張膽，大街大巷劏狗嗎？」聲稱曾投票畀鄺俊宇嘅「Lam Yan Amanda」就話︰「其實我有份投你票，但如果件事未清楚時我覺你唔應該咁樣po上fb！同埋你因為你既（嘅）影響力幾大！如果人地（哋）真係賣羊肉！你咁會害到人執粒（笠）！......掛羊肉被屈賣狗肉，真正既（嘅）香港。」
更多人係期望鄺俊宇唔好再潛水，出返嚟道歉，唔好用完議員嘅影響力去屈人之後，就當冇件事。不過，鴿黨咁樣處事都唔係第一次，早排該黨核心成員林子健嘅「釘書機奇案」，咪又係開完記招扮冇嘢。