■麥德正反駁健吾時自認反對派。fb截圖反對派呢期反「一地兩檢」反上腦，除咗喺立法會大肆拉布之外，各區仲出現好多反「一地兩檢」嘅banner（橫額），堅離地就梗㗎啦，好唔好睇亦都係見仁見智，至少電台節目主持人健吾（葉鍵濠）就覺得麻麻哋嘞。健吾日前攞咗工黨東區區議員麥德正嘅反「一地兩檢」banner，同隔籬工聯會嘅反急症室加價banner嚟比較，反問市民在乎邊樣嘢多啲，又寸麥德正幅banner個設計夠隱蔽，從啲細眉細眼位可以說明反對派點解會輸咁話。當事人麥德正抵唔住頸，鬧鬧吓竟然教埋健吾點做傳媒人，講咗句「反對派唔係咁隊」，真係好大嘅官威啊！不過，麥德正俾建制同「本土」兩邊夾擊之後即刻熄晒火，改口話多謝大家關心佢幅banner個設計喎！■香港文匯報記者 陳庭佳
健吾前日喺facebook些牙（分享）咗幅相，入面有一幅寫住「一地兩檢破壞法治」嘅banner，同埋工聯會嘅反對急症室加價banner。健吾反問市民會在乎邊幅多啲，「法治定係急症室加價」，又話「一地兩檢」嗰幅係邊個出睇都睇唔清楚，「點解香港反對派會輸，其實喺呢啲細眉細眼位就睇到。」有網民認出嗰度係西灣河太安樓對出，而幅反「一地兩檢」banner係麥德正擺嘅。
唔少人都覺得健吾有啲道理，好似《輔仁媒體》主編熔癌（容樂其）話：「『一地兩檢』有幾破壞法治呀？連『飯民』都無興趣解釋畀人知啦。」退出咗「青症」嘅九龍城區議員鄺葆賢，就話「一地兩檢」有好多切入點，「講錢都大把嘢講」。「Eric Tsang」認為幅banner除咗設計差、撞色之外，仲係「一地兩檢關注組」成批過嘅出品，喺唔同地方放一幅就算，如果建制派例如民建聯、工聯會、新民黨同自由黨等各一幅，「一望落去四比一喎，氣勢都輸×晒啦！」近排喺網上非常活躍嘅民建聯東區支部，亦都讚健吾夠貼地。
斥健吾無知 「反對派唔係咁隊」
麥德正隨即喺fb還拖，寸健吾無知，又好難得咁自稱反對派，話「反對派唔係咁隊」：「你平時無留意區議員做啲乜，唔緊要。你唔係住西灣河，唔識區情，唔緊要。你早幾年上過我寫字樓做訪問，??家唔認得我，都唔緊要。健吾，你話法治唔夠緊要？哈哈，如果係咁，我就唔會當選啦。」
佢仲想一石二鳥鬧埋建制派，先寸工記幅banner幾個月都唔換，再將民記東區支部喺健吾度嘅留言cap圖（截圖），話健吾有埋建制派加持喎。
俾個素人教佢點做propaganda（政治宣傳），健吾嬲得滯燒埋成個工黨，拎返港大民研前幾日公佈嗰個「十大政團」調查結果，寸工黨因為知名度低不入十大，「港大民研數字唔係假㗎呵？係咪隊緊『泛民』呀？」
民記東區支部亦都唔執輸，抽水道「原來反對派係唔可以隊」，希望麥德正對街坊唔係咁。熔癌就覺得工黨太天真太傻，「你哋班垃圾以為鬧吓啲唔會出來選嘅網紅 / 電台時事評論員，就會2019（年）掃晒區議會、2020（年）掃埋立法會。」
隔咗一日，麥德正熄晒火，尋日出post話「多謝大家關心橫額設計」，幅banner點改善當然有得搞，「尋晚見到健吾嘅POST，我照字面理解作出回應，大家對健吾嘅post有不同嘅理解，關心到橫額設計對於宣傳嘅影響，都係正面嘅意見，幫到我的。」
真心定假意，大家自己諗啦。