今晚谷草安排八場夜賽，以最窄C加三欄C加六彎作賽，頭場下午七時十五分開跑，全晚唯一盃賽是由四班馬跑一哩角逐聖安道挑戰碟。練馬師方面，蘇偉賢、霍利時及文家良均派出多匹實力馬列陣，值得優先留意。騎師方面，史卓豐、韋達及巴度各有不少爭勝分子在手，宜盯緊。
第一場、第五班、一二○○米。「快趣的」衡量賽績或伸算能力，處身五班怎計都佔上風，季內三戰，頭兩仗都受制檔劣未竟全功；前仗跑濕慢泥地尤其嚴重影響了發揮，然而直路仍可交出甚佳衝刺，這一席第五名水準殊不失禮；上次再戰韋達搏晒老命力保一席Q腳；今次渡江轉爭千二路合發揮，只要有好形勢配合，有力再度躋身三甲。
第二場、第五班、二二○○米。「火天大有」V布北半球中長途氣袋，上季首次降入五班即現虎相開齋；踏入今季四戰田草一哩及千八，跑得兩殿兩第五未失獎金；今次減回四十分又可落五班搵食，練者即揀二千二大長途，兼搵三匹廄侶掩護出擊，必有殺着。
第三場、第四班、一二○○米。「君子精神」季內兩戰谷草一千，初出在郭能胯下後上爆出十倍冷W；上仗再戰，郭能就揀騎「鑽得勁」上陣，結果眼光獨到冇揀錯一出即勝，「君子精神」改配潘頓後上追入第三；拚後復課以慢工夫作備戰，態況仍在勇點，今仗打鐵趁熱改爭千二，可望再次凱旋而回。
第四場、第四班、一二○○米。「星光大師」季內五戰雖不入三甲，惟四戰谷草千二跑獲兩殿一第五，演出經常接近，再看上仗轉戰田草千二，廿二倍大冷沿途走二疊，最後入彎打衝鋒只跑得一席第五，負於超班馬「以奇用兵」敗不足辱；拚後再減兩分，今次復爭谷草千二，環看對手實力爾爾，睇怕都係郁手時候。
第五場、第四班、一六五○米。「帝勝之星」今季兩戰田草千四，前仗閘前落重注僅追入季軍，表面看名次毫不特別，然而要留意這一役頭三段步速五十九秒四三，比對同日五班同程「金武士」贏馬一組的五十七秒七一，還要慢了一秒七；上仗加眼罩再來，一早守好位，入直路保持速度只跑第三；拚後官仔馬出跳火氣仍旺，今次轉戰窄場一哩，如步速正常處境有利後追，對手要抵擋牠的後勁決非容易事。
第六場、第三班、一二○○米。「萬利高」季內兩戰谷草千二，前仗初出明贏變輸，但與人馬沒有太大關係，錯在首次跑谷草兼排外檔，又錯在直路初被對手碰撞，不然頭馬「快樂火龍」應未能抵擋到牠後勁；上次「萬利高」排一檔，潘頓都慳晒位一步不蝕，可惜鬥拉士再次影相飲恨功虧一簣；今次加兩分升班接戰，負磅如釋重負，如決心打硬仗力足補中。
開心歡星以逸待勞
第七場、第三班、一二○○米。「開心歡星」上季初出六戰只得一位，對此匹自購馬的能力有多少保留；然而經過一個暑期，進步一日千里，上仗賽前由雷神連試三課，鏡頭矚目，乃正面信息，雖然此駒在八月中有數天沒有露面，幸好整個九月的操練完整無缺，結果一出即在同程殺入一席第三；拚後一直操而不戰，以逸待勞今仗有力補中。
第八場、第三班、一六五○米。「劍聶風」季內轉到東廄三戰，首場比賽在泥地一哩大敗而回，賽後更仄到氣管有痰，敗績可抹去；前仗首次角逐谷草一哩，蔡明紹全程不上不落，採取順其自然跑法，大半程三四疊望空跑，結果尚有第五；上仗四檔起步沿途居中，入彎打衝鋒影相僅敗得亞；仄準後今回負磅有利，力足一逞。
