日本賽駒已成為國際賽不可忽視嘅勢力，上季「滿樂時」、「里見皇冠」同「新寫實派」三匹堀宣行馬房賽駒勝出三場G1，擸走獎金超過三千五百萬，咁大條水路，難怪近年報名咁踴躍，今年日本都有唔少實力馬攻港，短途方面就有高松宮紀念賽兼短途馬錦標雙料亞軍「唐吉快跑」，一哩方面就由應屆安田紀念賽盟主的「神燈光照」擔大旗，至於重頭戲二千米香港盃，除咗有女皇盃冠軍「新寫實派」領軍外，去年香港盃季軍「善得福」及香港瓶第五嘅「醒目層次」，都會再度聯手攻堅，不過上述幾駒，都唔及參戰香港瓶嘅出爐菊花賞冠軍「神業」咁搶鏡，此駒寧願放棄獎金豐厚嘅國內有馬紀念賽而一心來港，可見幕後對呢場一級賽應該幾有把握，而「神業」嘅練馬師正正係遠征成績向來出色嘅角居勝彥，佢嘅父系女皇盃盟主「統治地位」，當年都係由角居勝彥一手訓練，究竟佢哋可唔可以實現香港父子制霸，真係值得期待。
回說本地周日賽事，有多匹新馬初試啼聲，當中文家良馬房的「放閃」有可能一如馬名般發光發亮。「放閃」早在周歲時由馬主王學森於新西蘭卡拉卡拍賣會中，以十四萬紐元買入，母系源自「丹山」未嘗上陣，「放閃」其中一匹同父同母姐姐Fix名氣極大，本身是新西蘭冠軍雌馬，並在新西蘭打吡大賽中，挑戰一批雄馬跑獲第二，實力絕對不簡單。「放閃」不單止是新西蘭打吡大賽亞軍的全血緣馬，本身也與南非打吡大賽有密切的關係，其同母姐姐、出自天文學家的Galileo's Destiny在南非打吡大賽跑入第二名。「放閃」出自戰鬥力高企的母系，估計插四班有力即食。