蔡約翰夜賽以「紅運爵士」增添頭馬，現時頭馬成績剛好跟姚本輝一樣，大家都贏到十四場，不過蔡約翰第二名比姚本輝多，所以排在第二位，僅次於徒弟仔羅富全，而兩師徒目前喺龍虎榜串Q，相信佢哋都好有自豪感，有口痕友話，羅富全會唔會開倉第一季就攞冠軍，呢個未必冇可能，因為睇睇呢個倉初出隻「精明才子」，隔晚無端端成為大熱門，好多人都半信半疑，羅富全咁叻仔，有本事可以練到隻一出即勝質新馬。事實的確暫時未得住，因為初出「精明才子」俾今季轉投葉楚航馬房大勇嘅「僥倖」殺咗，但呢隻「范高爾」子嗣，第一鋪就安排跑谷草夜賽，呢條賽道唔係隻隻馬初出都掂，即使掂都要練馬師睇得好準，好似隻「金湶德」咁，被捧成大熱門，最終連位置都冇。所以羅富全部署新馬及練新馬功夫未必叻得過師父蔡神仙，但亦唔係二打六角色，所以今季跟師父鬥到過終點並唔係冇可能，大家可以睇埋佢周日隻「不可說」（圖藍色綵衣）又跑成點，就知道羅富全今季有冇冠軍相。
話說呢隻「不可說」，型格好靚仔，到港初期經已引得潘頓垂青，結果第一課大閘用潘頓試八百米，走位4 3 1，起步唔算太快，但跑過一半路程，隻馬自動加速，終點前越過「新強勇駿」及「飛霸龍」贏馬。而「飛霸龍」一出贏「八十八十」開齋，呢課閘反映「不可說」係隻唔簡單馬，彈完呢課大閘，到咗前個禮拜五，馬房又再同呢隻馬安排彈課泥地閘，呢課得第三名，但頭兩隻馬係上個禮拜剛取勝嘅「紅衣醒神」同「爭分奪秒」。「不可說」竟然可跟到兩隻一班馬返嚟，咁即係講，插四班上陣唔話佢超級都應該半超級，呢次初出跑直路賽，睇睇同場對手，全部都唔叻，所以「不可說」要一出即勝相信冇乜難度。