梅姐昨早入馬房，主要搵副練睇吓「喜裝寶」同「喜旺寶」呢對同主馬，「喜旺寶」大家都知道係乜料，至於新上陣隻「喜裝寶」被評九十二分，插二班出賽，當然有番咁上下來頭，呢隻馬父母均與「喜旺寶」一樣屬全兄弟馬，基本上性能差唔多，所以「喜裝寶」插二班形勢非常有利，即使初期跑短啲相信都有制敵本錢。梅姐呢次入倉睇「喜寶」系兩隻馬，亦吩咐副練要早午督操，據悉「喜裝寶」與「喜旺寶」一對同主馬，均指定用外籍騎馬人午間到機坪踱，踱步期間，王志偉要用手機錄低影像，並即時傳番俾倉主睇。馬房手足透露，呢隻「喜裝寶」很快適應本港環境，食料亦冇問題。由於呢隻馬與「喜旺寶」屬全兄弟馬，後者來港的部署手法亦可以作為借鏡。「喜旺寶」上季來港喺三班起步，首仗出戰千四米，同「喜裝寶」今次部署一樣，結果「喜旺寶」在港首仗即獲季軍，呢場第一名係「勝得威」、第二名係「爭分奪秒」，兩隻都係一班跑千四米強者，所以「喜旺寶」首次出戰未贏並不足辱，之後返到千六米即見威力，更首季創出四捷佳績。至於「喜裝寶」今次跑千四米可能嫌短些少，但排十二檔又唔同咁講，因為呢隻馬最後喺法國贏嗰場係千六米，靠追排外檔唔會蝕得去邊，反而排內檔，早段唔夠快，仲要花時間入直路搵位，所以今次排個外檔，基本上貝湯美可以疊埋心水爆一段，講質素肯定屬一班馬，「小巨人」要過佢呢關都唔易。